ТӨРАҒАЛЫҚТЫҢ ЕКІНШІ ЖАРТЫСЫ

ЕҚЫҰ-ға мүше мемлекеттер сыртқы істер министрлерінің бейресми кездесуімен басталмақ Бүгін Алматыда Еуропадағы қауіпсіздік және ынтымақтастық ұйымына мүше мемлекеттердің сыртқы істер министрлері бас қосады. Саммит десеңіз де, кездесу десеңіз де бейресми дейтін анықтауышы бар. Алайда бейресмилігіне қарамастан, осы кездесу көп мәселелерді анықтайтыны және бар. Бұрындары ЕҚЫҰ-ға кім төр­ағалық етіп жатқанын біле бер­мей­тінбіз, тіпті бәзбір елдің сырт­қы істер министрін ЕҚЫҰ-ның іс басындағы төрағасы ретінде Елбасы қабылдап жатқанын ес­тігенде таң қалатынбыз. Ұйымға төрағалық ету Қазақстанның еншісіне тигенде ненің не екенін жақсы түсінетін болдық. Бұрынғы Ұйым жетекшілерін Қазақстанға келгенінде ғана танып жататын болсақ, бүгінде төраға елдің Президенті, әлемнің кез келген елінде Қазақстан деген атаудың баламасы ретінде айтылатын Нұр­сұлтан Назарбаевты ғана емес, Қазақстан Республи­ка­сы­ның Мемлекеттік хатшысы – Сырт­қы істер министрі Қанат Сау­­дабаевты ЕҚЫҰ-ға мүше қай мемлекеттің де жүгірген баласы­нан еңкейген қариясына дейін жыға танитынына көзіміз жеткен­дей. Елбасы Нұрсұлтан Назар­баев­тың тікелей ұсынысымен және басшылығымен ЕҚЫҰ төрағасы ретінде Қазақстан жүргізіп жат­қан шаралар әлем елдері тара­пынан қолдау тауып отырғаны белгілі. Соның ішінде мемлекет­тер арасындағы даулы мәселе­лер­ді шешуге қос тарапты да илік­тіру, Қырғызстандағы төңкерістен кейінгі жағдайды сабасына түсіру, Ауғанстандағы ахуалды тұрақ­тан­дыру үшін қам жасау, осыдан 20 жылдай бұрын өзінің тікелей өнеге көрсетуімен ядролық қауіп­сіздікті барынша азайту жөнінде нақты нәтижелерге қол жеткізу, басқа да халықаралық ұйымдарға өз төрағалығын пайдаланып, Еуро­па мен Азияның, Еуропа мен мұсылман әлемінің арасын жа­қын­дату Қазақстанның төраға ретіндегі бастамашылдығымен жүзеге асып жатқанын мақта­ныш­пен айтуға болады. Сол қа­тар­дан орын алатын бір шара бүгін Алматыда басталып, ертең қала маңындағы “Ақбұлақта” жалғасатын болып отыр. Бағдарламаның жүзеге асуы барысында өзгерістер болуы да мүмкін, алайда қазіргі болмы­сы­ның өзі оқиғаларының көптігімен таңдандырады. Шараның бірінші күнінде Іс басындағы төрағаның жиырма шақты кездесуі көздел­ген екен. Екінші күнінде конфе­ренцияның ашылуын, оның екі сессиясы кезінде тағы да сон­шалықты кездесулердің өтетінін ескерсек, олардың бәрі бірлесе келіп, үлкен Саммит туралы нақты мәселенің шешілуіне мүмкіндік берсе, атымыздың бәйгеден келгені дей берейік.