Павлодарда халықтар достығы жайында жиын өтті

ПАВЛОДАР. 1 наурыз. Павлодарда «Қазақстан халқы Ассамблеясы –жаһандану үрдісіндегі достық үлгісі» атты ғылыми-тәжірибелік конференция өтті. Бұл туралы egemen.kz тілшісі хабарлады. Облыс орталығындағы С.Торайғыров атындағы университетте өткен конференцияда «Славян мәдени орталығы» қоғамдық бірлестігінің төрайымы Татьяна Кузина баяндама жасады. Ол сөзінің соңында студенттерді 26 сәуір күні өтетін Президенттік сайлауға белсенді түрде қатысуға шақырды. Педагогикалық институттың Еуразиялық интеграция және студенттік Ассамблея орталығының директоры Сәуле Мамытова және «Эльпида облыстық грек ұлттық мәдени орталығы» қоғамдық бірлестігінің төрайымы Людмила Ифандопуло сөз алып, «Қазақстан халқы Ассамблеясы-20 ізгі іс» республикалық іс-шарасының қоғам үшін маңыздылығын атап өтті. Жиын барысында жаһандану үрдісінде еліміздегі халықтардың қоғамдық келісім мен ұлттық бірлікті сақтауға бағытталған жұмыстарының стратегиясы мәңгілік екені айтылды. Сондай-ақ, конференцияға қатысқан студенттер де ел тұрақтылығын нығайтудағы Елбасының парасатты саяси бағыт-бағдарын қолдайтындарын танытты. Фарида Бықай. Дерек, сурет: egemen.kz.