Серік Ахметовтің үй қамақтағы мерзімі тағы 1 айға ұзартылды

АСТАНА. 15 мамыр. Қазақстанның бұрынғы премьер-министрі Серік Ахметовтің үй қамақтағы мерзімі осы жылдың 18 маусымына дейін ұзарды. Бұл туралы Қарағанды қаласы Қазыбек би аудандық сотының баспасөз қызметі хабарлады. Аталған соттың баспасөз хатшысы Әлия Жошева бұл жөнінде: «Бүгін судья Еркеш Мәукен Серік Ахметовтің үй қамақтағы мерзімін 2015 жылдың 18 маусымына дейін ұзарту туралы қаулы шығарды», – деді. Айта кетейік, бұрынғы шенеунікке ірі көлемде мемлекет қаражатын жымқырды және пара алды, қызметін асыра пайдаланды, сондай-ақ, заңсыз кәсіпкерлікпен айналысты деген күдік негізінде Қылмыстық кодекстің 4-бабы бойынша 6 қылмыстық айып тағылуда. Соған сәйкес, 2014 жылдың 19 қарашасынан 2015 жылдың 18 ақпанына дейін үй қамаққа алынды. Кейін үй қамақ мерзімі 2015 жылдың 18 сәуіріне және 18 мамырына дейін екі рет ұзартылды. Еламан Қоңыр. Дерек: Қарағанды қаласы Қазыбек би аудандық сотының баспасөз қызметі. Сурет: zakon.kz.