Рас, кейінгі кезде ауданда дарынды оқушыларды қолдау дәстүрге айналып келеді. Жақында республикалық және халықаралық олимпиадалар мен ғылыми жобаларда топ жарған оқушылар мен олардың жетекшілері ұлықталды. Қараөзен мектеп-лицейінде «Дарындыға дара жол» атты дәстүрлі кеш өтті. Тағылымды іс-шараға облыс орталығынан білім саласының лауазымды басшылары арнайы келді.
Қазталов ауданының әкімі Асланбек Сарқұловтың айтуынша, кейінгі үш жылда ауданда 4 мектеп пайдалануға берілген. Тағы екі мектеп күрделі жөндеуден өтіп, материалдық техникалық база нығайтылған. Мұның бәрі білімнің сапасын да арттырары сөзсіз.
Өткен оқу жылының ауыз толтырып айтарлықтай табысы да мол дедік. Ауыл балалары әсіресе ана тіліне жүйрік. Мысалы, республикалық олимпиадада Алма Оразбаева атындағы мектептің 11-сынып оқушысы Дана Серікқызы қазақ тілі мен әдебиеті пәнінен І орын, Қараөзен мектеп-лицейінің 10-сынып оқушысы Аяулым Тілепберген ІІ орын, Ғиният Молдашев атындағы мектептің 11-сынып оқушысы Матхат Рашидов ІІІ орынды жеңіп алған.
Республикалық шығармашылық және зияткерлік байқауларда топ жарған оқушылар да аз емес. Кенжебек Меңдәлиев атындағы мектептнің 11-сынып оқушысы Мақсат Хамзин «Алтын түлек» математикалық олимпиадасының республикалық кезеңінде ІІІ орын алса, Қараөзен мектеп-лицейінің 11-сынып оқушысы Аят Шоқат осы олимпиададан ІІІ орын иегері атанды. Бірлік орта мектебінің 11-сынып оқушысы Айзада Жолдыбай, Ғұмар Қараш атындағы мектеп-гимназиясының 11-сынып оқушысы Қарақат Нұрболат, Қазталов мектеп-лицейінің 11-сынып оқушысы Аяулым Жұмагелді де республикалық математикалық олимпиадада жүлделі орын иеленген.
Сүлеймен Есетов атындағы мектеп-бөбекжай кешенінің 8-сынып оқушысы Ақжүрек Темірханов «Табиғатты аяла» республикалық форумында ІІ орын алса, Кенжебек Меңдәлиев атындағы мектептің 11-сынып оқушысы Наргиза Елеусінова республикалық «Ақберен» байқауында ІІ орынға ие болды. Ақпәтер орта мектебінің 10-сынып оқушысы Айсәуле Талғатқызы XXVI республикалық «Абай оқулары» байқауында ІІ орын иеленіп, өнерімен көпшілікті тәнті етті. Ғиният Молдашев атындағы мектептің 8-сынып оқушысы Әмина Думанқызы республикалық «Әбіш оқуларында» ІІ орын иеленсе, Алма Оразбаева мектебінің 11-сынып оқушысы Ғазизжан Нұрдаулет «Ақберен» байқауынан ІІІ орын және республикалық «Әбіш оқуларынан» І орын жеңіп алды.
Республикалық ғылыми жобалар конкурсында үздік танылған жас зерттеушілер де аз емес. Сүлеймен Есетов атындағы мектеп-бөбекжай кешенінің 5-сынып оқушысы Айлана Нұрланқызы, Қазталов мектеп-лицейінің оқушылары Мұхамедәли Мақсатұлы, Еңлік Аманжолқызы, Миралі Мирланұлы, Шынтемір Мұхтарұлы және Бостандық орта мектебінің 7-сынып оқушысы Саят Жайықұлы республикалық «Зерде» ғылыми жобалар байқауында жоғары нәтижеге қол жеткізді.
Міне, осы оқушылар байқауда жеңіп алған сыйлығынан бөлек, аудан басшылығы тарапынан да құрмет көрді. Оқушыларға ноутбук, ақшалай сертификаттар табысталып, жетекші ұстаздарға қаржылай сыйақы берілді. Республикалық пәндік олимпиада жеңімпазының жетекшісіне 1 млн теңге, ІІ орынға 700 мың теңге, 3 орынға 500 мың теңге көлемінде қаржылай сыйақы тиді. Республикалық шығармашылық және зияткерлік байқаулар мен ғылыми жобалар конкурсында үздік танылған оқушылар мен жетекшілері де қаржылай сыйлыққа ие болды.
– Осыдан үш жыл бұрын шәкіртім Ақжан Зейноллақызы республикалық олимпиадада бірінші орын алып, ұстазы ретінде 500 мың теңгелік сертификатпен марапатталған едім. Бүгін Аяулым шәкіртімнің арқасында тағы құрмет көрдім. Мұның барлығы ұстаз бен шәкіртке артылған сенім, қошемет пен қолдау. Білім әлемінің жанашырларына мың алғыс! – дейді Қараөзен мектеп-лицейінің математика пәнінің мұғалімі, педагог-модератор Әсемжан Тасқалиева.
Айта кетейік, ауданның үздік оқушыларын құрметтеп, қаржылай қолдауға аудан әкімі мен аудандық мәслихат депутаттары, кәсіпкерлер мұрындық болған. Сондай-ақ Орал қаласындағы «Батыс Бизнес» ЖШС директоры Аян Серікұлы да жерлестерінің бастамасына қомақты үлес қосқан. Бұл қолдау алда да жалғаспақ. Осы күзде ауылда тұратын, мал ұстайтын әр ұстазға 1 тіркеме шөп тегін берілетін болды.
Батыс Қазақстан облысы
