Көңіл айту жеделхаттарын жолдады

Елбасы Нұрсұлтан Назарбаев Тунис Республикасының Президенті Беджи Каид Ас-Себсиге Сус қаласында болған террорлық актіге байланысты көңіл айту жеделхатын жолдады, деп хабарлады Қазақстан Президентінің баспасөз қызметі. Көңіл айту жеделхатында Мемлекет басшысының Сус қаласында болған террорлық акт салдарынан көптеген Тунис және шетел азаматтарының қаза тапқаны туралы суыт хабарды зор күйзеліспен қабылдағаны атап өтілген. «Қазақстан барша әлемнің бейбітшілігі мен қауіпсіздігіне елеулі қауіп төндіріп отырған халықаралық экстремизм мен терроризмді үзілді-кесілді айыптайды», – делінген жеделхатта. Нұрсұлтан Назарбаев Қазақстан халқының және жеке өзінің атынан қаза болғандардың туыстары мен жақындарына, сондай-ақ, барша Тунис Республикасының халқына көңіл айтып, зардап шеккендердің тезірек сауығып кетуіне тілектестік білдірді. * * * Қазақстан Президенті Нұрсұлтан Назарбаев Кувейт Мемлекетінің Әмірі Сабах әл-Ахмед әл-Джабер ас-Сабахқа Әл-Кувейт қаласында болған террорлық актіге байланысты көңіл айту жеделхатын жолдады, деп хабарлады Президенттің баспасөз қызметі. Көңіл айту жеделхатында Мемлекет басшысының Әл-Кувейттегі террорлық акт салдарынан көптеген жазықсыз жандар қаза тапқаны және зардап шеккені туралы қайғылы хабарды зор күйзеліспен қабылдағаны айтылған. «Біз дүниежүзілік қоғамдастықтың халықаралық экстремизм мен терроризм қатеріне қарсы күрестегі күш-жігері мен қадамдарын толық қолдаймыз», – делінген жеделхатта. Нұрсұлтан Назарбаев Қазақстан халқының және жеке өзінің атынан қаза болғандардың туыстары мен жақындарына, сондай-ақ, бауырлас Кувейт халқына көңіл айтып, жапа шеккендердің тезірек сауығып кетуіне тілектестік білдірді.