Шетелдегі қазақстандық студенттер елордада бас қосты

Кеше елордада Қазақстанның шетелдегі студенттік ұйымдарының екі күндік IV слеті басталды. «Болашақ» қауымдастығы, «Нұр Отан» партиясының «Жас Отан» ЖҚ, сондай-ақ, Білім және ғылым министрлігінің қолдауымен өтіп жатқан шараға 250-ден астам студент қатысуда. Негізінен студенттер әлемнің 16 елінен (Ұлыбритания, АҚШ, Канада, Австралия, Германия, Испания, Франция, Швейцария, Вен­грия, Чехия, Польша, Қы­тай, Корея, Малайзия, Ресей, Түр­кия және басқа да елдер) келіп­ті. Шетелдегі қазақстандық студент­тердің ұйым саны 60-қа жеткен. Жиынға мемлекеттік органдар мен ұлттық компаниялардың өкілдері, «Болашақ» бағ­дар­­­ла­ма­сының стипендиаттары, кәсіп­керлік, азаматтық сектор сала­сындағы сарапшылар және басқа салалардың мамандары қатысуда. Слеттің түске дейінгі отырысы «Слеттен келесі слетке: тұжырым, идея, даму» сұх­бат алаңына арналып, шетел­дегі студенттік ұйым­дар көш­басшылары жыл ішіндегі жұмыстарының нәти­желерімен бөлісіп, алдағы іс-жоспар­­­лары мен жобалар жайын сөз етті. Ал пленарлық отырыс­та модераторлық жасаған «Нұр Отан» партиясы Қоғамдық саясат институтының директоры Саясат Нұрбектің атап өткеніндей, Елбасы «Болашақ» бағдар­ламасы түлектеріне бірқатар жауап­ты қыз­меттерді сеніп тапсыруда. Сол түлек­­тердің бірі – «Бәйтерек» ҰБХ» АҚ басқарма төрағасы Қуан­­­дық Бишімбаев алдымен сөз алды. Ол өз сөзінде «Болашақ» қауым­дастығы кеңесі құрылғандығын тілге тиек ете келіп, жастарды кәсіпкерлікке тарту жайы өзекті болып отырғандығына назар аудартты. Басқарма төрағасының сөзінен мәлім болғандай, қазіргі кезде алғаш рет қазақстандық «бизнес кейс» жинағы әзірленуде. Бұл кітапты оқып шыққан әрбір жас қандай ше­шім қабылдаған дұрыс деген сұраққа ­жауап табуы тиіс. «Мемлекет басшысы «Болашақ» бағдарламасының стипендиаттары мен түлектеріне үлкен үміт артып отыр. Сондықтан да, біз Президент пен халықтың бізге артқан сенімін ақтау үшін бар күшімізді сарқуымыз керек», – деді Қ.Бишімбаев. Болашақтықтардың мемлекет құрылымын жетілдірудегі әлеуетінің мол екендігін жеткізген БҒМ Жастар саясаты жөніндегі департаментінің директоры Роза Кәрібжанова 2015 жылдан бастап ағылшын тілін үйрету 6+6 моделіне көшкендігін айтып берді. Яғни, енді студенттер ағылшын тілінде Назарбаев Университет пен әл-Фараби атындағы Қазақ ұлттық университеті базасында оқытылады, ал қалған жарты­жылдықты шетелдерде жалғастыратын болады. «100 нақты қадам» – Ұлт жос­парын жүзеге асыруда жоғары білікті еңбек ресурстарымен қамтамасыз ету үшін мықты білім беру жүйесінің қажеттігі ерекше сезілгендігіне тоқ­талған Р.Кәрібжанова қазіргі таңда елімізде 10 жоғары оқу орнында инновациямен айналысуға мүмкіндіктер ашылғандығына тоқталды. Жалпы, еліміздегі жоғары оқу орындарының жанынан 500-ге тарта ғылыми-зерт­теу құрылымдары мен бөлімшелері ашылған. Сондай-ақ, Назарбаев Университет тәжірибесі негізінде кешенді басқару тетігі енгізілуде. Білім беру, ғылым және өндірісті интегарциялау жүзеге асырылуда. Бұдан басқа коммерциялау жөніндегі 13 офис ашылған. Және де 3 технопарк пен 4 бизнес инкубатор құрылған. Қазақстандық жастардың шетелдерде Қазақстанды танытатынын алға тартқан «Халықаралық бағдарламалар орталығы» АҚ президенті Ғани Нығы­ме­тов қазіргі кезде шетелдерде 40 мыңға тарта қазақстандық білім алып жатқандығын атап өтті. Олар құрған ұйымдар «Қазальянс» ұйымына бірік­ті­ріліп, қазақстандық студенттер өздерін үлкен отбасы қамқорлығында екенді­гін сезінетіндей жағдай қалып­тасып отыр. Өз өкілдіктерінің әлемнің бес қаласында (Лондон, Мәскеу, Берлин, Шанхай, Вашингтон және Бостон) орын тепкендігін атаған Ғ.Нығыметов бұл өкілдіктер шетелдердегі қазақстандық студенттері ұйымдарының бастамаларына қолдау көрсетуге әзір екендігінен де хабардар етті. Ал бүгін Қазақстан гуманитарлық-заң университетінде «Идеядан бизнес – модельге дейін: стартаптың «өміршең­дік» жолдары», «Бизнестегі тиімді келіс­сөздер», «Кәсіпкерлік. Ал­ғашқы қадам» және «Бизнестің әлеу­меттік желілерде дамуы» тақы­рып­­тарында бизнес-тренингтер ұйымдастырылады. Асқар ТҰРАПБАЙҰЛЫ, «Егемен Қазақстан».