Магнитудасы 7,1 балға жеткен бұл зілзаланың эпицентрі Эверест тауына жақын орналасқан Намче-Базар елді мекеннің жанында болған. Үндістан метеорологтарының дерегі бойынша, жерасты сілкіністері жергілікті уақыт бойынша 12.35-те басталып бірнеше минутқа созылған. Жер сілкінісінің нағыз кіндігі 10 шақырым тереңдікте орын алған.
Сәуір айынан бері күн сайын орын алатын зілзаладан зәрезап болған Катманду қаласының тұрғындары құрылыс ғимараттарының жанына жақындамай, үнемі ашық аспан астында түнеп келеді. Солай бола тұрса да, жергілікті биліктің мәлімдеуінше, соңғы зілзаладан ондаған адам қаза болып, мыңдаған тұрғындар зардап шеккен. Бұдан бұрын «Диалог» агенттігі Непалда лай көшкіні басталуына байланысты жер сілкінісінен зардап шеккендерді іздестіру шаралары тоқтатылғанын мәлімдеген болатын. Соңғы жер сілкінісіне байланысты құтқару шаралары қайта жандандырылды. Тек бір тәуліктің ішінде құтқарушылар Лангтанг ұлттық паркінде орналасқан деревнядан 120 адамның мүрдесін тапқан. «Алайда, Лангтанг ұлттық паркі орналасқан маңайда жиі-жиі лай көшкіндері орын алуда. Сондықтан, құтқарушылардың жұмысын жалғастыруына ешбір мүмкіндік болмай тұр. Олар қазір жұмыстарын уақытша тоқтатуға мәжбүр», деп хабарлады жергілікті билік шенеунігі Гаутама Римал Рейтер агенттігіне.
Соңғы мәліметтер бойынша, Непалда болған зілзала зардаптарының құрбандары 8 мыңнан асып, 17576 адам әртүрлі жарақаттар алған.
