Батыстық мәдениет тағзымды байлайды

Қазақстан Президенттігіне кандидат, Тұрғын Сыздықов Астана қаласының ЖЭС жұмысшыларымен кездесу өткізді. Кездесуге, сондай-ақ, сайлауалды штабының жетекшісі Айқын Қоныров қатысты. Өз сөзінде Тұрғын Сыздықов кездесуге қатысушыларды сайлауалды тұғырнамасының негізгі қағидаларымен таныстырды. Сондай-ақ, ол ХІХ ғасырдағы ғылыми коммунизмнің негізін қалаушылар – Карл Маркс пен Фридрих Энгельс тарихи тәжірибеге негізделе отырып, қоғамдық дамудың объективті заңдарын жасай келе, адами қоғамды жаңа коммунистік формацияға көшіру қажеттігін теориялық негізде дәлелдеп бергенін атап өтті. «Біз ғылыми коммунизм идеясын жалғастыруға қарай үлкен қадам жасадық. Дамудың көп кезеңді жолдарынан өттік. Партияда партиялық бұқараны бақылау, оны бюрократияландыруға жол бермеу, даму үрдістерін болжау, ауыспалы жағдайға дер кезінде әре­кет етудің тұрақты тетіктері жұмыс істейді. Мұның бәрі өмірдің тұрмыс­тық қажеттіліктерінен туындап, бұқа­раның шынайы шығармашы­лығына негізделеді», – деп көрсетілген  Т.Сыз­дықовтың сайлауалды тұғырнамасында. Сонымен қатар, кандидаттың сайлауалды бағдарламасында батыстық мәдениет пен құндылықтардың көлеңкелі әсері жайында мәселе көтерілген. «Жаһандық компьютерлендіру мен батыстық электрондық БАҚ қоғамның сана-сезімін улап, адамдардың арасына іріткі салу үшін индивидуализм қағидатын насихаттауда, бұл өз кезегінде ғаламшардың мәдени тұтастығының құлдырауына алып келуі мүмкін. Еуропа елдерінде тұтынушылық қоғам құрылымдарының қалыптасуынан туындаған батыстық мәдениет дағдарысы батыстық өркениеттің әмбебап құндылықтар мен әлеуметтік тұрмыс-тіршілік нормаларына деген наразылықтарына қарама-қайшы келуде. Батыстың кемшіліктері,  әсіресе, мәдениет саласында анық байқалады.  Себебі, тұтыну, әлеуметтік құбылыс ретінде, көп жағдайда материалдық қажеттілікті қанағаттандыруды өмірдің мәні деп қарастыратын құндылықтар мен идеялар жүйесіне негізделген», – деді Тұрғын Сыздықов. Оған қоса, кандидат Тұрғын Сыз­дықовтың сайлауалды бағдарламасында батыстық кинематография стан­­дарт­­тарының кері әсері туралы мәсе­лелерге мән берілді. «Кинематографияның батыстық стан­дарттары зорлық-зомбылыққа, аз­ғындыққа тәрбиелейді. Осыдан барып қатыгез күштердің, жағымсыз кейіп­керлердің өз заңдарын насихаттауына жол ашылды. Батыстық кинематография зорлық-зомбылыққа деген қызығушылықты оятып, оны адам­ның сана-сезіміне жат эстети­калық нормаға айналдырды. Батыс­тық мәдениеттің осынау күдікті «жетістігі» батыстық өркениеттің бар­лық салаларының дамуына көлеңке тү­сіріп отыр. Батыстық әдебиеттің де жағдайы мәз емес. Ол әлемдік мәдениеттегі өзінің бұрынғы әлеуетінен айырылып, зорлық-зомбылық пен бұқаралық әдепсіздікті насихаттайтын кинематографияның жетегінде кетті», – деп көрсетілген Т.Сыздықовтың сайлауалды тұғырнамасында. Кездесу соңында штаб жетекшісі А.Қоныров жиынға қатысушыларға жүргізіліп жатқан насихат жұмыстары жайында айтып берді. «Штабымыздың сенімді тұлғалары анықталды. Олар барлық ақпараттық жұмыстарды жүргізетін болады. Қолымызда жұмыс жоспары бар. Бірқатар кездесулер мен іс-шаралар жос­парланған. Біздің штаб БАҚ өкіл­дерімен тығыз байланыс орнатты, олар үшін есігіміз әркез ашық. Кандидатымыздың қызметі мен оның сайлауалды тұғырнамасы туралы бар­лық қажетті ақпараттарды ұсынуға дайынбыз», – деді А.Қоныров. Кеше сондай-ақ, Қызылорда қаласында Тұрғын Сыздықовтың аймақтық сайлауалды штабының таныстырылымы өтті. Қызылорда облысы бойынша аймақтық штабтың жетекшісі болып Талғат Телубаев тағайындалды. Талғат Телубаев партияда 4 жылдан аса жұмыс істеп келеді. Мамандығы журналист, біраз уақыт мұғалім болып қызмет атқарды. «Бір ай көлемінде штаб Т.Сыз­ды­қовтың кандидатурасын қолдау аясында бірнеше іс-шара өткізуді жоспарлап отыр. Штаб құрамында 5 сенім біл­дірілген адам жұмыс істейді. Насихат материалдары алынды, қазір оларды тарату жұмыстарымен айналысып жатырмыз», – деді таныстырылым барысында Т.Телубаев. Эльмира МӘТІБАЕВА, «Егемен Қазақстан».