Астана «ақылды» қалалар қатарына енбек

 

Инновациялық кластерлерді дамыту мен қалыптастыру барысында шетелдік инвестицияларды тарту және сыртқы экономикалық біріктіруді жандандырудың тиімді тетігі жатыр. Осы мақсатта елімізде көптеген жобалар қолға алынып, бірқатар міндеттер атқарылуда.

Президент жанындағы Ор­та­лық коммуникациялар қыз­метінде өткен баспасөз мәсли­хатында аталған саланың қазіргі таңдағы ахуалы жөнін­де ха­бар­дар етілді. БАҚ өкіл­дері­мен кездесуге келген «Астана – жаңа қала» арнайы эконо­ми­ка­лық аймағын әкім­шілен­діру басқармасы» мем­лекет­тік мекеме­сінің басшысы Ілияс Жанғас­кин мен «Ас­тана Inno­vations» АҚ басқар­ма төрағасы Әл­тайыр Уызбаев Ас­та­нада инно­вациялық кластерді дамыту тақырыбын тарқата айтты. АЭА аумағына Астананың екі индустриялық паркі кіре­ді. Индустриялық парктер – бұл жеңіл­дікті салық және кеден ре­жімі белгіленген жаңа өнер­кәсіптік аймақтар. Инвесторлар кор­поративтік және табыс салы­ғынан, мерзімі 10 жылға дейін учаскені жалға алу төлем­ақысынан, жер салығынан, мүлікке салынатын салықтан босатылды, деді Ілияс Жанғаскин өз сөзінде. Ал бұл тұрғыда едәуір салықтық жеңілдіктер инвестицияларды тарту мен өндірістерді қосу үшін АЭА аймағын және индустриялық парктерді тартымды ететіндігін айтты. Сондай-ақ, «Астана – жаңа қала» арнайы экономикалық аймағында 2002 жылмен салыс­тырғанда биыл тартылған инвес­тициялар көлемі екі триллионнан аса теңгені құрады, ал 2010 жылы барлығы 393,5 млрд.теңге сомасына өнім шығарылды, деп атап өтті І.Жанғаскин. Келесі кезекте сөз алған Әл­­тайыр Уызбаев 2013 жылы Ас­та­наны дамыту жөніндегі кеңес­те Елбасы Нұрсұлтан Назар­­баев Үкіметке және Астана әкімдігіне 2017 жылы Аста­на қаласын әлемнің 50 «ақылды» қалаларының рейтингіне көтеру мәселесін тапсырғанын айта келе, осының аясында бірқатар мәліметтермен таныстырды. Сонымен қатар, «Астана Inno­vations» компаниясының қызметі негізгі үш бағыт бойынша жұмыс істейтіндігін алға тартты. Олар­дың қатарына инновациялық стар­таптарды қолдау, «Smart Astana» бағдарламасын іске асыру, сондай-ақ, Астана қаласының тыныс-тіршілігін кешенді қамта­масыз ету жүйесін дамыту жатады, деді Ә.Уызбаев. Аталмыш үш бағытқа жеке-дара тоқталып өт­кен ол, бірінші бағыт бойынша стартап-компанияларға олар­ды дамытудың бастапқы кезеңін­де қаржылық және кеңес беру қыз­меттері көрсетілетіндігін айтты. Ал, келесі бағыт аясында елор­да өміріне инновациялық Smart технологияларын ендіру қызме­ті тұрғандығын жеткізген Ә.Уыз­баев осы бағдарлама шеңберінде Smart ЕРЦ, Smart мектеп, Smart емхана, Smart көлік, Smart авто­тұрақ, Smart ТКШ және Smart жа­рық­тандыру сияқты жобаларды іс­ке асыру жүргізілетіндігін айт­ты. Сондай-ақ, компания қыз­метінің үшінші бағыты Астана қаласының «Тыныс-тіршілігін кешенді қамтамасыз ету жүйесі» бағдарламасын іске асыру болып табылатындығын жеткізді. Эльмира МӘТІБАЕВА, «Егемен Қазақстан».