Астанада отандық футбол мамандары бас қосты

АСТАНА. 24 тамыз. Астанадағы Қазақстан футбол федерациясының кеңсесінде футбол орталықтары директорларының қатысуымен жиын өтті. Басқосуға федерацияның бас хатшысы Азамат Айтқожин, балалар және жасөспірімдер футболы департаментінің директоры Сергей Кенетаев, Кәсіпқой футбол лигасының спорт директоры Павел Демьян және аймақтық футбол орталықтарының 7 техникалық директоры қатысты. Бұл туралы Қазақстан футбол федерациясының баспасөз қызметі хабарлады. Федерацияның бас хатшысы орталықтарды құруды және олардың жұмыс істеуінің маңыздылығын атап өтті. Өз кезегінде техникалық директорлар футбол орталықтары мен клубтар жұмысының арасындағы қиындықтарға және инфрақұрылым мәселелеріне тоқталды. Орталықтардың толыққанды жұмысына қатысты өзге де мәселелер сөз болды. Жиын қорытындысы бойынша футбол орталықтарының жетекшісі болып Владимир Белявский тағайындалды. Сонымен қатар, орталықтың тиімділігін арттыруға және кәсіби футболшылар даярлауға көмектесетін бірыңғай құжат қабылдануы тиіс. Айта кету керек, футбол орталықтары 2012 жылдан бастап ашылып келеді. Қазіргі таңда еліміздің 14 қаласында 14 осындай орталық жұмыс істейді. Алдағы уақытта Ақтау мен Петропавл қалаларында да ашылмақшы. Еламан Қоңыр. Дерек, сурет: Қазақстан футбол федерациясының баспасөз қызметі.