9-10 сәуірде «Жас Отан» жастар қанатының кезектен тыс III съезі өтеді. Бұл туралы кеше «Жас Отан» жастар қанатының 2020 жылға дейінгі «Жастар – Отанға!» бағдарламасын әзірлеу бойынша ұйымдастырылған қорытынды жиналыс барысында белгілі болды.
Бұл бағдарлама «Жас Отан» жастар қанатының кезектен тыс III съезінде қабылданатын болады. Ол ұйымның әрі қарайғы іс-қимылы үшін идеологиялық бағдар болмақ, сондай-ақ, «Қазақстан-2050» Стратегиясын іске асыруда табысқа қол жеткізуге бағытталған.
Отырыс барысында «Жас Отан» жастар қанатының атқарушы хатшысы Нұрлан Сыдықов сөз алып, аталған бағдарламада 4 негізгі бағытқа айрықша назар аударылғанына, бұл құжаттың негізінде «Нұрлы Жол» бағдарламасы мен «Нұр Отан» партиясының Саяси доктринасында көрсетілген құндылықтар жатқанына тоқталды. «Жаңа бағдарламада әр жас қазақстандық табысының негізі ретінде 4 негізгі бағыт көрініс тапқан. Біз патриотизм, жеке қабілетті дамыту, білім мен еңбекке құштарлық, кәсіби өрлеу мен отбасылық құндылықтар сияқты басымдықтарға ерекше назар аудардық», деді Н. Сыдықов. Ол, сондай-ақ, съезд жұмысына Қазақстанның аймақтарынан 2 мыңға тарта азамат қатысатынын, олар «Жас Отан» жастар қанатының белсенділері, жастар ұйымдарының мүшелері, шығармашыл жастар, жас ғалымдар, спортшылар, мәслихат депутаттары, жұмысшылар, ауыл жастары екенін атап өтті.
Бүгінгі күнге дейін аталған бағдарлама жобасы еліміз бойынша жастардың арасында жан-жақты талқыланған. Мұндай талқылаулар «Еркін пікір» пікірталас клубы отырысының шеңберінде өңірлік конференцияларда, «Жас Отан» жастар қанатының 1700 бастауыш бөлімінде өткен. Бұл бағдарламаны әзірлеу барысында сарапшылар мен республиканың барлық өңіріндегі жастардың ұсыныстары ескерілген екен.
Ләйла ЕДІЛҚЫЗЫ,
«Егемен Қазақстан».
Суретті түсірген,
Ерлан ОМАРОВ.
