Жапырағы жайқалған әулет

Бір үй – бір ел

Үйдің берекесі қабырғасының қиюымен емес, теңінің жиюымен, отбасындағы сыйластықпен, татулықпен кіреді.

Нұрсұлтан НАЗАРБАЕВ.

Өлкенің, атыраптың, елдің тірегі емес пе бәйтеректей жайқалған әулеттер. Ақжайық ауданындағы Сақыпкерей мен Күлән Жантуриндердің шаңырағы солардың бірі болып табылады. 1961 жылы отау тіккен олардың бай еңбек жолы да, тәлімді тұрмысы да нағыз өнеге мектебі дерсің. Еңбек демекші, бүгінде марқұм Са­қыпкерей ағаның да, қазір үш немере, алты жиен, бір шөберенің бағына бөленген Күлән ананың да басын қайырмаған шаруа жоқ. Аудан орталығы – Чапаев­тың іргесіндегі Жайық ауылында сонау жылдары ша­руа­шылықтағы мал борда­қылаудың бел ортасында бол­ды. Күлән ана аудандық Кеңестің депутаттығына да сайланып, ортақ мүдде орайында қыруар іс тындырды. Беу, жылдар-ай дейсің. Ұлы Отан соғысы кезінде, 1944 жылы опат болып, Тернополь облысы, Вербища селосы маңына жерленген әкесі Хамза секілді Жеңіс сарбаздарының рухын аялап, алты ұл-қызын, бүгінде олардан өрбіген ұрпақ­ты елжандылыққа, ең­бек­қор­лыққа, елгезектікке, жауап­кершілікке баулыған оның әулетін ақжайықтықтар мақтан тұтады. Мұндай отбасылар әманда тағзымның төрінде, құрметтің өрінде. Бала тәрбиесінде өзі­нің анасы, 105 жас жасап, бақилыққа аттанған, аудан­ның шежіресін жатқа соққан Қапиза Ахметованың орны зор болғанын Күлән ана мақтанышпен айтады. Өзінен бұрынғылардың еңбекті аманаттағанын да ұр­пағының құлағына құйып отырады. Еңбек десе елең­деп тұратын, бүгінде ел ағасы жасына таяған ұлы Әліп­қалидың арқасында 20 шақты ірі қара, 40 шақты уақ жандық, қылқұйрық та өсіріп, соның игілігін көріп отыр­ғаны да сондықтан. Мек­тептегі сабақтан қалт еткенде кішкентайлар мал бағымына жағаласып жүреді. Шіркін, сондағы алтын бесік ауыл­дың суретін айт! – Адамға керек нәрсе көп. Бірақ, балапандар – балаға жететін не бар дейді, – Күлән Жантурина. Бұл сөзге не алып-қосарсың. Болат ЕСҚАЛИЕВ.Батыс Қазақстан облысы. Ақжайық ауданы. Чапаев ауылы. Қазақстаным – қарашаңырағым Әулеттің иесі Афлят Дямуршаев Қармақшы ауданындағы ІІІ Интер­национал ауылындағы «БААР» үйірмесіне жетекшілік етеді. Айта кету керек, Афляттың әкесі Тельман «Қармақшы ауданының құрметті азаматы» болған. Дямуршаевтардың шаңырағында төрт бала бар. Тұңғышы Дафлят биыл Қызылорда қаласындағы Қорқыт ата атындағы  мемлекеттік университетті тәмам­дайды. Шехназ «Болашақ» уни­верситетінің ІІІ курс студенті, Ис­лам Шымкент қала­сындағы рес­публикалық әскери мектеп-интернатта оқиды. Нұрсұлтан 4 жаста. Афлят пен Гокчак Дямур­шаевтар  – Қазақстанның өсіп-өр­кендеуін жан-тәнімен қалайтын, еліміздің әрбір жетістігіне шын қуа­натын адамдар. Өйткені, олар өз­дерінің тағдырын Қазақстаннан бөліп қарай алмайды. Ержан БАЙТІЛЕС, «Егемен Қазақстан». Қызылорда облысы.