Үкімет басшысы Литва премьер-министрімен кездесті

АСТАНА. 19 мамыр. Бүгін Астанада Премьер-Министр Кәрім Мәсімов пен Литва Үкіметінің басшысы Альгирдас Буткевичюстің қатысуымен келіссөздер өтіп, бірқатар құжаттарға қол қойылды. Бұл туралы «ҚазАқпарат» хабарлады. Кездесу барысында екі елдің үкіметтері арасында құпия ақпараттарды өзара қорғау туралы келісімге қол қойылды. Сондай-ақ, Қазақстанның Қаржы министрлігі мен Литваның Ішкі істер министрлігі жанындағы қаржылық қылмыстарды тергеу жөніндегі қызметтің арасында қылмыстық жолмен алынған кірістерді заңдастыруға (заңсыз жолмен табылған ақшаның ізін жасыруға) және лаңкестікті қаржыландыруға қарсы әрекеттер саласында өзара іс-қимыл туралы келісім бекітілді. Сонымен қатар, Қазақстанның Ауыл шаруашылық министрлігі ветеринарлық бақылау және қадағалау комитеті мен Литваның мемлекеттік азық-түлік және ветеринария қызметі ынтымақтастық туралы меморандумға қол қойды. Бұдан бөлек, Қазақстанның Ақтау қаласы мен Литваның Клайпеда қаласы арасында достық пен ынтымақтастық жөніндегі ниеттестік хаттамасы бекітілді. Еламан Қоңыр. Дерек: «ҚазАқпарат». Сурет: egemen.kz.