Белгілі спортшы Александр Емельяненко 4,5 жылға сотталды

АСТАНА. 19 мамыр. Ережесіз жекпе-жек шебері, белгілі спортшы Александр Емельяненко күштеп жыныстық әрекетке барғаны үшін айыпты деп танылып, 4,5 жылға сотталды. Сондай-ақ, спортшыға 50 мың рубль көлемінде айыппұл салынды. Бұл туралы РИА «Новости» хабарлады. Екі жақтың пікірталасы кезінде прокурор соттан Емельянеконы 5 жылға бас бостандығынан айырып, 60 мың рубль көлемінде айыппұл салуды сұраған еді. Бұған дейін спортшыға зорлық жасады, төлқұжат ұрлады және пәтерін тазалап жүрген әйелді есірткі қолдануға үйретті деген айыптар тағылған болатын. Спортшының қорғаушысы Александр Карабанов кейіннен прокурордың есірткіге бейімдеу айыбынан бас тартқаны туралы хабарлады. Алайда, қорғаушы басқа айыптардың дәлелденгенін мойындады. Қылмыстық іс құжаттарында Александр Емельяненконың өткен жылы 3 наурызда Мәскеудегі пәтерінде үйін тазалайтын әйелді қорлап, сөмкесіндегі төлқұжатын ұрлап алғаны туралы айтылады. Алайда, спортшы байланыстың екіжақты келісіммен болғанын айтты. Александр Емельяненко – ережесіз жекпе-жек бойынша халықаралық жарыстарда топ жарып жүрген белгілі спортшы. Сондай-ақ, оның даңқты Федор Емельяненконың інісі екені белгілі. Еламан Қоңыр. Дерек: РИА «Новости». Сурет: twitter.com.