ҚАЗЫНАЛЫ ТҮБЕКТІҢ ҚАРЫМДЫ ЖОБАЛАРЫ

Үкімет басшысы Кәрім Мәсімов еліміздің батыс өңіріне  жұмыс сапарын Маңғыстау облысынан бастады 20 шілдеде Маңғыстау облы­сына жұмыс сапарымен келген Қазақстан Республикасының Пре­мьер-Министрі Кәрім Мә­сі­мов бір­ден “Шопан ата” мәдени-ескерт­кіш кешеніне жол тартты. Мұнда аймақтық “Мәдени мұра” бағдарламасымен та­ныс­ты. Рес­пуб­ликалық маңыздағы ескерткіш – “Бекет ата” жер ас­ты мешітіне сапар барысында Премьер-Ми­нистрге Бекет ата­ның ағымдағы жылы аталып өте­тін 260 жылдық мерейтойына дайындық шаралары танысты­рыл­ды. Киелі жерге зиярат етушілердің қатары жыл санап көбейіп келеді. Сондықтан мемлекет “Қызылсай-Шопан ата-Оғланды” автокөлік жолының құрылысын қолға алып, аяқтауға жақын. Маңғыстау облы­сының әкімі Қырымбек Көшер­баев аталған автокөлік жолының құры­лы­сын аяқтау үшін қосымша қа­ражат керек екенін, ол қаражат би­ыл­ғы республикалық бюджетті нақтылау барысында қаралса деген ойын жеткізді. Қазіргі таңда Қы­зыл­сай-Оғланды автожолының жоспарланған 103 шақырымының 78 шақырымы төселді. К.Мәсімов бұл мәселе Үкіметте қаралатынын айтты. Келесі кезекте Үкімет басшы­сы “Өзен-Түркіменстанмен мем­ле­кеттік шекара” темір жол желі­сі­нің құрылыс барысын көрді. Рес­публикалық бюджет пен Азия Даму банкінің бірлесе қаржылан­дыруы арқылы іске асырылып жатқан жоба 2011 жылы аяқталуы тиіс. Үкімет басшысы теміржол құрылысын еліміз тәуелсіздігінің 20 жылдығына дейін аяқтауды тап­сырды. “Мемлекет басшысы бұл жобаны өзінің ұдайы бақылауында ұстап отыр. Жоба Қазақстан тәуел­сіздігінің 20 жылдығына дейін аяқталуы тиіс. Бұл – Пре­зиденттің жеке тапсырмасы”, – деді Үкімет басшысы. Жоба бойынша инвестиция­ның жалпы көлемі – 74 млрд. тең­ге, оның ішінде республикалық бюджеттен 8,2 млрд. теңге бағытталуда. Жобаның сметалық құны 65 млрд. теңге. Бүгінде жерге қатысты барлық қажетті жұмыстар атқарылып, құ­ры­лыс қарқынды жүріп жатыр. Құ­рылысқа 700 техника жұмыл­ды­рылған. Жоба бойынша қазір 7,6 млрд.теңге көлемінде қаржы иге­рілді. Теміржол желісі іске қосыл­са, 812 тұрақты жұмыс орны ашы­лады. Ал аталмыш бағытпен тек астық тасымалдағанның өзінде экспорттық әлеуеті 3 миллион тон­надан 8 миллион тоннаға дейін жетеді. Бұл туралы “Қазақстан темір жолы” ҰК” АҚ президенті Асқар Мәмин мәлім етті. “Өзен-Түркіменстанмен мем­лекеттік шекара” темір жол желісі – “Өзен–Қызылқия–Берекет– Этрек–Горган” жобасының бір бө­лігі. Алып құрылысты Қазақ­стан, Түркіменстан және Иран мем­лекеттері бірлесіп бір мезгілде бастады. Жаңа желі Еуропа мен Азияны жалғастыратын “Солтүс­тік–Оңтүстік” халықаралық көлік дәлізінің маңызды тармағы болып саналады. Жалпы ұзындығы – 686 шақырым, оның 146 шақырымы Қазақстан аумағынан өтеді. Халықаралық темір жол желісі құрылысы Қазақстанның транзит­тік және экспорттық әлеуетін күшейтеді. Жаңа бағдар солтүстік пен оңтүстіктің жолын қазіргі магистральмен салыстырғанда 600 шақырымға жақындатады. Аталмыш жоба экспорттық әлеуетті дамыту мен сыртқы на­рық­қа шығуға ықпал етеді. Қазақ­стан Парсы шығанағы мен Иран­ның теңіз айлақтарына жүк тасы­малдайтын болады. Жаңа көлік дәлізі таяу және алыс шетелдер­мен тауар айналымы мен сауданы жаңа деңгейге көтереді. Мұның тағы бір артықшылығы сонда, тура темір жол бағдары көліктік шы­ғындарды да азайтуға ықпал етеді. Оған қоса жобаны жүзеге асыру Қазақстанның батыс өңіріндегі инфрақұрылымды дамытып, аймақ экономикасына жаңаша серпін береді. К.Мәсімов темір жолдың айналасында қызмет көрсететін жаңа нысандар мен әлеуметтік жобалардың құрылысын да қолға алуды, сөйтіп, жаңа жұмыс орын­дарын ашу, Жаңаөзен қаласының әлеуметтік жағдайын жақсарту ісіне баса мән беруді тапсырды. 21 шілдеде Үкімет басшысы Бейнеу ауданына барып, Боранқұл газ өңдеу зауытында болады. Онда нысан құрылысын аяқтау шарала­ры талқыланбақ. Мұнан соң Пре­мьер-Министрге “Бейнеу-Ақтау” ав­томобиль жолын қайта құры­лым­дау” жобасы таныстырылады. Үкімет басшысының өңірдегі жұмыс сапары Ақтау теңіз сауда портында жалғасады. Сонымен қатар облыс орталығындағы білім беру, денсаулық сақтау нысан­да­рын­да болып, білім беруді дамы­тудың 2011-2020 жылдарға ар­нал­ған мемлекеттік бағдарламасының жобасын, денсаулық сақтауды дамытудың 2011-2015 жылдарға арналған “Саламатты Қазақстан” мемлекеттік бағдарламасының атқарылу барысын талқылайды. Сапар соңында Үкімет бас­шы­сы “Бейнеу-Бозой” газ құбыры мен “Бейнеу-Шалқар” темір жолының құрылысы мәселелері бойынша жұмыс мәжілісін өткізеді. “Егемен-ақпарат”.