Жеңіс күніне орай Ақтауды безендіруге 2,1 млн. теңге жұмсалады

АҚТАУ. 6 наурыз. Жеңіс күніне орай Ақтау қаласын безендіру жұмыстарына жергілікті бюджеттен 2,1 млн. теңге қарастырылған. Бұл туралы egemen.kz тілшісі хабарлады. Осы қаржыға Ақтауды Жеңіс мейрамына безендіруден бөлек, маңғыстаулық батырлар мен қазіргі көзі тірі ардагерлеріміздің суреттерін қала көшелеріне, LED экрандар мен таблоларға орналастыру, сондай-ақ, «Мәңгілік алау» монументінің жанынан Жеңістің 70 жылдығына арнап арнайы барельеф орнату көзделген. «Бірінші барельефке майдан алаңы бейнеленсе, екінші барельефке тыл бейнеленетін болады. Себебі, Жеңіске майдандағы әскери күшпен бірге, тылдағы ерен еңбек те үлес қосты. Сонымен қатар, маңғыстаулық Кеңес Одағының Батырлары Мәди Бегенов, Жұмағали Қалдықараев, Біләл Қалиев, «Даңқ» орденінің иегерлері Кемер Оңғалбаев, Павел Малаев, Ленин орденді Исатай Сүйеубаев пен Қартбай Бекжановқа арнайы ескерткіштер орнатылатын болады», дейді Ақтау қаласының әкімі Еділ Жаңбыршин. Ақтауда соңғы екі жылда 8 соғыс ардагері мемлекеттік тұрғын үй қорынан баспаналы болған, қазір Ақтау қаласы бойынша тұрғын үй кезегінде тұрған бір де бір ардагер жоқ. Ақтау қаласы әкімінің айтуынша, пәтерлері жөндеуді қажет ететін ардагерлердің үйлеріне жөндеу жұмыстарын жүргізу қолға алынған. Мереке қарсаңында арнайы «Ардагерлерге көмек» атты жастардың әлеуметтік көмек командасы жасақталып, жастар ардагерлердің үйі-шаруасына көмектесіп, күнделікті тұрмыстағы жұмыстарына қолғабыс жасамақ. – Жаз маусымында тілек білдіріп отырған кәсіпкерлердің көмегімен ардагерлердің денсаулығын оңалту бойынша нақты шаралар қабылдайтын боламыз. Яғни, ардагерлерді республикамыздың емдеу-сауықтыру орталықтарына жібереміз. Ал қазір облыстық денсаулық сақтау басқармасымен бірлесіп тез арада ардагерлердің денсаулығына толық тексеру жасауымыз керек. Соғыс ардагерлері аурухана, емхана жағалап жүрмеуі үшін арнайы мобильді топ жасақтап, қариялардың үйлеріне барып, денсаулықтарын тексеретін боламыз, – дейді қала әкімі. 1 наурыздан бастап барлық білім беру ұйымдарында, мектептер мен балабақшаларда Жеңіс күніне арналған «Ерлік сабақтарын», «Бейбітшілік сабақтарын» және «Еске түсіру сағаттарын» өткізу қолға алынса, сәуір айында панкратионнан қалалық ашық біріншілік өткізу жоспарланған. Аталған біріншілікке Атырау, Ақтөбе, Орал, Қызылорда облыстарының командалары қатысады деп күтілуде. Ал қазан айында «Жауынгер, сенің ерлігің өшпейді!» атты оқу орындары студенттерінің театрландырылған көрмелерінің байқауы ұйымдастырылмақ. Гүлайым Шынтемірқызы. Дерек: egemen.kz. Сурет: tumba.kz.