Атырауда күннен қуат жинайтын станса салынады

АТЫРАУ. 6 наурыз. Атырау облысының Жылыой ауданында күннен қуат жинайтын станса салу қолға алынады. Бұл туралы egemen.kz тілшісі хабарлады. Таулары мен қыраттары жоққа тән жазық далада орналасқан Атырау облысы жел мен күннен қуат жинауға таптырмайтын өңір. Қазірдің өзінде Атырау облысында желден энергия өндіретін қондырғыларды пайдаланып отырғандар бар. Енді Жылыой ауданының аумағынан күннен қуат өндіретін арнайы станса салу ісі қолға алынғалы отыр. Қазірдің өзінде бұл жобаны іске асыру үшін арнайы жер телімі берілді. Атырауда алғаш рет қолға алынатын жоба бойынша 10 МВт электр энергиясын өндіру жоспарланған. Жобаға 10 миллион доллар көлемінде инвестиция салынбақ. Жобаны іске асыратын мердігерлікке «Экопроект-Құлсары» серіктестігі таңдалып отыр. Жолдасбек Шөпеғұл. Дерек: egemen.kz. Сурет: business.gov.kz.