Ақтөбеде 2 адамды өлтірген қылмыскер 18 жылға сотталды

АҚТӨБЕ. 20 мамыр. Ақтөбе облысының қылмыстық істер жөніндегі мамандандырылған ауданаралық соты жергілікті халықты дүр сілкіндірген қылмыстық іске нүкте қойды. Бұл туралы egemen.kz тілшісі хабарлады. Нақты айтсақ, 2012 жылдың қыркүйегінде және 2015 жылдың қаңтар айында азамат В.Литвинов Ақтөбе қаласында екі адамды өлтірген. Онымен қоймай, құрбандарының бірінің мүлкін ұрлаған. Осы қылмысы үшін Қылмыстық кодекстің 99-бабы, 2-бөлігі, 13-тармағы және 188-бабының 1-бөлігі бойынша кінәлі деп танылып, 18 жылғы бас бостандығынан айырылды. Жазасын қатаң режімдегі түзеу колониясында өтейді. Қылмыскер 2012 жылдың қыркүйек айында «Алтай» сауда үйінде жеке кәсіпкер азамат Р.Мұхамбеталинге аяқ киім сатушы болып жұмысқа орналасқан. Бау-бақша учаскесіндегі спирттік ішімдік ішуден кейін кәсіпкермен жанжалдасып қалады. Нәтижесінде қасақана кеуде қуысына пышақ салған. Жәбірленуші алған жарақаттан қайтыс болды. Ал Литвинов сол күні кешке мәйітті қылмыс құралымен бірге аталған учаскеге көміп тастаған. Қолы қанға малынған қылмыскер осы жылдың 17 қаңтарында тағы бір адамның өліміні себеп болды. Ол үй телефонымен қоңырау шаламын деген сылтаумен өзінің бұрынғы танысы Г.Коркинаның үйіне кірген. Әңгіме барысында азаматша оның алкогольдік ішімдіктерге жақын екенін, сол үшін де жұмыста жоқтығын айтқан. Өзіне қатысты сынды жеке басына тіл тигізу деп қабылдаған Литвинов кіреберіс бөлмедегі шкафтың үстінде жатқан балтаны алып, оның басына 20-ға жуық соққы жасайды. Салдарынан жәбірленуші оқиға орнында қаза тапты. Ал В.Литвинов жәбірленушінің пәтерінен 3 000 теңге мен 25 000 рубльді және бағасы 3000 теңге тұратын Panasonic маркалы радиотелефонын ұрлап кеткен. Сатыбалды Сәуірбай. Дерек, сурет: egemen.kz.