Петропавлдағы әйелдер колониясында жұмыс орындары ашылды

ПЕТРОПАВЛ. 6 наурыз. Петропавлдағы ЕС-164/6 әйелдер колониясында қосымша жұмыс орындары ашылды. Бұл туралы Солтүстік Қазақстан облыстық қылмыстық атқару жүйесі департаменті хабарлады. Жеке кәсіпкер Евгений Щеголев бұл мекемемен үш жылдан бері қоян-қолтық жұмыс жасап келеді. Алғашқы кезде онға жуық сотталушы ғана еңбекке тартылса, өткен жылы олардың саны 70-ке жетті. Бүгінде барлығы 95 жазасын өтеуші жұмыс істейді. «Отандық тауар өндірушілерді қолдауға бағытталған мемлекеттік бағдарламалардың арқасында өндіріс орнын кеңейту мүмкіндіктері табылып, тағы 20 адам жұмыспен қамтылып отыр», – дейді Евгений Сергеевич. Колония аумағындағы ғимаратты жалға алып отырған кәсіпкер шағын және орта кәсіпті дамыту мақсатымен моншаға қажетті бұйымдарды шығарады. Өз өнімдерін Қостанай, Ақмола облыстарына және Астана қаласына сатуды жүйелі ұйымдастырып келеді. Өнімдердің шетелдік тауарларға қарағанда бағасы қолжетімді, сапа жағынан да кем түспейді. Колонияның басшысы Бибігүл Мансұрованың айтуынша, жұмысқа орналасуға ниет еткен сотталушылардың кәсіби даярлығы мен жеке басының тәртібі, мінез-құлқы бірінші кезекте ескеріледі. Бұл тәжірибенің абақтыдан босап шыққаннан кейінгі өмірлеріне де пайдасын тигізеріне еш күмән келтірмейді. Өмір Есқали. Дерек: Солтүстік Қазақстан облыстық қылмыстық атқару жүйесі департаменті. Сурет: inform.kz.