Оралда апатты үй тұрғындарына жаңа баспана беріледі

ОРАЛ. 6 наурыз. Орал қаласының Деповская көшесіндегі апатты №18 үйдің тұрғындары №5 шағын аудандағы уақытша баспанаға көшірілді. Бұл туралы egemen.kz тілшісі хабарлады. Көп кешікпей аталған көшедегі өзге де апатты үйлердің тұрғындары уақытша қонысқа орын алмастырмақ. Өйткені биыл апатты деп танылған үйлер бұзылып, оның орнына көп қабатты үйлердің құрылысы басталмақ. Нақты айтар болсақ, тоқсан пәтерлік тоғыз қабатты және 144 пәтерлік тоғыз қабатты жаңа үйлер салынады. Құрылыс жұмыстары аяқталғаннан кейін уақытша мекенжайдағылар түпкілікті жаңа баспанаға қайта көшіп келмек. Мұндай игі шара қаладағы апатты үйлердің тұрғындарын баспанамен қамтуға бағытталған қанатқақты жобаның аясында жүзеге асырылмақ. Тұрғындарды көптен бері толғандырып келген түйткілді мәселенің түйіні мемлекеттік-жекеменшік әріптестік шеңберінде шешімін таппақ. Яғни, «БолашақТ» және «СВ плюс» құрылыс компаниялары бұл іске білек сыбана кірісуге тілек білдірді. Жоба бойынша Орал қалалық әкімдігі, құрылыс компаниялары және тұрғындар арасында үш жақты келісімшартқа қол қойылды. Соған сәйкес қалалық әкімдік құрылыс жұмыстары кезінде тұрғындарды мемлекеттік тұрғын үй қорынан бөлінген уақытша баспанамен қамтамасыз етеді. Жоғарыда аталған құрылыс компаниялары үйді салып біткеннен кейін оны тұрғындарға жекеменшікке береді. Бұл кезде жаңа баспана ескі пәтерлердің ауданына сәйкес ұсынылады. Жаңа үйлерді инженерлік инфрақұрылыммен қамтамасыз ету мемлекет есебінен жүргізіледі. Орал қалалық әкімдігінің баспасөз қызметі ұсынған мәліметке сүйенсек, облыс орталығындағы 32 үй апатты жағдайда деп танылған. Бұл үйлерде 325 отбасы тұрады. Өзге үйлердің де мәселесі осы үлгіде кезең-кезеңмен шешімлек. Темір Құсайын. Дерек: egemen.kz. Сурет: priru.kz.