Солтүстік Қазақстанда көктемгі егіске дайындық пысықталды

ПЕТРОПАВЛ. 6 наурыз. Петропавлдағы Н.Погодин атындағы облыстық орыс драма театрында өткен семинар-кеңесте көктемгі дала жұмыстарын ұйымшылдықпен жүргізу мәселесі талқыланды. Бұл туралы Солтүстік Қазақстан облысы әкімдігінің баспасөз орталығы хабарлады. Жиынға аудан, ауыл әкімдері, ведомстволардың, ұйымдардың және агроқұрылымдардың басшылары, ғалымдар мен өнім жеткізуші фирмалардың өкілдері қатысты. Семинар-кеңесті аймақ басшысы Ерік Сұлтанов ашып, жүргізіп отырды. Ол кіріспе сөзінде аграрлық сала облыс экономикасының негізі екенін айтып, «Оның үлесі жалпы өңірлік өнімнің 24 пайызын құрайды. Көктемгі егіс қол жеткен табыстарды одан әрі арттырудың қамы, басты шаралардың бастауы», деді. Облыс әкімінің бірінші орынбасары Айдарбек Сапаров көктемгі дала жұмыстарына байланысты алда тұрған міндеттерді баяндады. Мемлекет басшысының тапсырмасына орай егіс алқаптарын әртараптандыру мақсатымен 3 миллион 300 мың гектарға дәнді және дәнді-бұршақты, 568 мың гектарға майлы, 448 мың гектарға жемазықтық дақылдар себу көзделген. Минералдық тыңайтқыштар құнын арзандату үшін мемлекеттен 2 миллиард 158 миллион, гербицидке 2 милллиард 365 миллион теңге демеуқаржы бөлініп отыр. Өсімдік шаруашылығын қолдауға арналған демеуқаржының мөлшері 11,4 миллиард теңгені құрайды. Агроқұрылымдар мен серіктестіктер тұқыммен 93 пайыз қамтамасыз етілген. Жауапты науқанға 15,3 мың трактор, 16,2 мың тұқымсепкіш, 1100-дей себу кешені, 5,8 мың жүк автомобилі, 50 мыңнан астам топырақ өңдеу техникасы қатысады деп жоспарланған. Бүгінде машина-трактор паркі 72 пайызға дайын. Бараев атындағы астық шаруашылығы ғылыми-өндірістік орталығының директоры Жексенбай Қасқарбаев көктемгі дала жұмыстарының стратегиясы, Сібір ауыл шаруашылығы ғылыми-зерттеу институтының зертхана меңгерушісі Леонид Юшкевич Сібірдің оңтүстігіндегі көктемгі науқанды өткізудің ерекшеліктері, Сібір тәжірибе станциясы директорының орынбасары Александр Пузиков Батыс Сібір мен Солтүстік Қазақстан облысының майлы дақылдары жайлы пікірлерін алға тартты. «Әліби-Агро» жауапкершілігі шектеулі серіктестігі бақылау кеңесінің төрағасы Нұрлан Тілеубаев, «Астық-Стем» ЖШС-нің директоры Сергей Звольский көктемгі дала жұмыстарын ұйымшылдықпен өткізуге байланысты өз ойларымен бөлісті. Өмір Есқали. Дерек: Солтүстік Қазақстан облысы әкімдігінің баспасөз орталығы. Сурет: munara.kz.