Дэвис кубогы жарысында Михаил Кукушкин Симоне Болеллиді жеңді

АСТАНА. 6 наурыз. Дәл қазір Астанадағы «Дәулет» Ұлттық теннис орталығында теннистен Дэвис кубогы жарысы аясында Қазақстан мен Италия арасындағы ойын өтуде. Алғашқы ойында нөмірі бірінші теннисшіміз Михаил Кукушкин қарсыласы Симоне Болеллиді 3:0 (7:6 (8:6), 6:1, 6:2) есебімен жеңіп, жалпы есепте біздің команданы алға шығарды. Бұл туралы egemen.kz хабарлады. Алғашқы сетте 1 сағат 6 минут ойнаған қарсыластар жеңімпазды тай-брейк арқылы анықтады. Бұл сында отандасымыздың бағы басым болды. Ал екінші және үшінші сетте Болелли біздің теннисшіге қарсы еш шара қолдана алмады. Екінші сетте тек бір геймде ғана ұпай алған итальян келесі кезеңде еншісіне небәрі екі ұпай жазды. Кукушкиннің жеңісінен кейін Қазақстан 1:0 есебімен алға шықты. Қазір кортта қазақстандық Андрей Голубев пен қарсыласы Андреас Сеппи таласқа түсуде. Алғашқы сеттің қорытындысы бойынша Сеппи алда келеді. Ол бірінші кезеңде Андрейді 6:3 есебімен жеңді. Кукушкин мен Болелли арасындағы текетірес туралы айтар болсақ, қос теннисші осыған дейін 3 рет күш сынасқан. Өкінішке қарай, соның барлығында итальянның мерейі үстем болды. Яғни, бүгін Миша Болеллиді алғаш рет жеңіп отыр. Еламан Қоңыр. Дерек: egemen.kz. Сурет: daviscup.com.