Батыс Қазақстанда полиция қызметкері адам өлтірді

ОРАЛ. 6 наурыз. Батыс Қазақстан облысында полция қызметкері адам өлтіріп, алты жылға сотталды. Бұл туралы egemen.kz тілшісі хабарлады. Батыс Қазақстан облыстық сотының баспасөз қызметінің мәліметіне сүйенсек, оқиға желісі былай өрбіген. Приурал полиция бөлімі участкелік инпекторының көмекшісі Э.Ғаббасов Январцев ауылында тұратын жұмыс істемейтін азаматты өзінің үйіне қызметші етіп алған. Алғашқыда бәрі жақсы болғанымен күндер өте келе ол оны «отырса опақ, тұрса сопақ» жасап, екі аяғын бір етікке тыққандай күй кештіреді. Қызметші де тірі жан емес пе?! Бір де ол тәртіп сақшысының мазағы мен қорлығына шыдай алмай өз намысын қорғай отырып қатқылдау сөздер айтып қалады. Осы кезде көп сөзге келмеген полиция өкілі оған көптеген дене жарақаттарын салады. Мұнымен де тынбай жәбірленушінің бас тұсына ауыр соққылар жасайды. Соның салдарынан жәбірленуші өліп кеткен. Зеленов аудандық сотының үкімімен Э.Ғаббасов абайсызда жәбірленушінің өліміне соқтырған қасақана ауыр дене жарақатын салғаны үшін ҚР Қылмыстық кодексінің тиісті бабы бойынша алты жылға сотталды. Ол жазасын жалпы тәртіптегі түзеу колониясында өтейді. Үкім әлі заңды күшіне енген жоқ. Темір Құсайын. Дерек: egemen.kz. Сурет: sud.gov.kz.