«Сарыарқа» «Братина кубогының» ширек финалына шықты

АСТАНА. 6 наурыз. Жоғары хоккей лигасында (ЖХЛ) ойнайтын Қарағандының «Сарыарқасы» жарыстың ширек финалына шықты. Бұл туралы egemen.kz хабарлады. Плей-офф кезеңінің алғашқы сатысында «Сарыарқа» Челябинскінің «Челметімен» таласқа түсті. Алғашқы үш ойында жеңіске жеткен қарағандылықтар төртінші және бесінші кездесулерде жеңілуге мәжбүр болды. Ал бүгін Челябинскіде болған алтыншы ойында біздің команда қарсыластарын жүндей түтті. Бірінші және екінші кезеңдерде алты шайба соғып үлгерген «Сарыарқа» ойынның соңғы бөлігінде тағы бір мәрте нәтижелі соққы жасады. Айдын иелері «Сарыарқаның» жеті шайбасына екінші кезеңде соққан жалғыз голмен ғана жауап берді. Ойын барысында «Сарыарқа» сапынан Евгений Рымарев хет-трик атанса, Сергей Огородников екі рет мергендігімен көзге түсті. Одан бөлек, Евгений Белухин мен Михаил Паншин еншілеріне бір шайбадан жазды. Айта кетейік, «Сарыарқа» биыл ЖХЛ-дың тұрақты лигасын жеңіп алды. 52 ойыннан 110 ұпай жиған команда екінші орын алған Ижевскінің «Ижстальінен» 15 ұпай озып кетті. Сондай-ақ, «Братина кубогының» қазіргі иегерлері де осы қарағандылық хоккейшілер екені белгілі. «Сарыарқамен» қатар, сайыстың бұл кезеңінде тағы бір Қазақстанның командасы өнер көрсетті. Ол – Өскеменнің «Қазцинк-Торпедосы». Өкінішке қарай, аталған команда 1/8 финалдан аса алмады. Өскемендіктер төрт ойыннан тұрған тартыста «Ижстальға» есе жіберді. Еламан Қоңыр. Дерек: egemen.kz. Сурет: vhlru.ru.