ЖАЗА

Ақтөбе облысының қыл­мыстық істер жөніндегі маман­дандырылған ауданаралық сотында В.Литвиновке қатыс­ты жұртшылықты дүр сіл­кін­дірген қылмыстық іске үкім жарияланды. Айыптау қоры­тындысы бойынша 2012 жылдың қыркүйегінде және 2015 жылдың қаңтар айында азамат В.Литвинов Ақтөбе қаласында аса ауыр санаттағы екі қылмыс, яғни азамат Р.Мұ­хамбеталин мен азаматша Г.Кор­кинаны қасақана өлтіру, сон­дай-ақ, соңғысының мүлкін ұрлау қылмыстарын жасаған. 2012 жылдың қыр­күйек айының басында В.Лит­винов «Алтай» сауда үйі­не жеке кәсіпкер азамат Р.Мұ­хамбеталинге аяқ киім сатушысы болып жұмысқа орналасқан. Бау-бақша учас­кесіндегі спиртті ішімдік ішу­ден кейін араларындағы араздықты пайдаланып, кә­сіп­кермен жанжалдасып, қасақана кеудесіне пышақ салған. Жәбірленуші алған жарақаттан қайтыс болған. Одан кейін, ол сол күні кешкі уақытта жәбірленушінің мәйітін қылмыс құралымен бірге аталған учаскеге көміп тастаған. Қаны қарайған қылмыскер мұнымен де тынбайды. 2015 жылдың 17 қаңтарында В.Лит­винов үй телефонымен қоңырау шаламын деген сылтаумен өзінің бұрынғы танысы азаматша Г.Коркинаның үйіне кіреді. Әңгіме барысында азаматша оның алкогольді ішімдіктерге жақын екенін, жұмыста жоқ­тығын айтқан кезде өзіне қатысты сынды жеке басына тіл тигізу деп қабылдап, кіреберіс бөлмедегі шкафтың үстінде жат­қан балтаны алып, оның басына қа­сақана 20-ға жуық соққы жасап, соның салдарынан жәбірленуші қыл­мыс болған жерде қаза бол­ған. Одан кейін В.Литвинов жәбірленушінің пәтеріндегі сөреден 3000 тең­гені, 25000 рубльді, ба­ғасы 3000 теңге тұратын «Panasonic» маркалы радиотелефонын ұрлап кеткен. Сот үкімімен В.Литвинов бірнеше рет қасақана адам өлтіргені, бөтеннің мүлкін ұр­лағаны үшін кінәлі деп танылып, оған түпкілікті қа­таң режімдегі түзеу коло­ниясында 18 жылға бас бос­тандығынан айыру жазасы тағайындалды. Сатыбалды Сәуірбай, «Егемен Қазақстан». Ақтөбе облысы.