23 Шілде, 2010

Италияны таңғалдырған, енді Парижді тамсандырмақшы

497 рет
көрсетілді
1 мин
оқу үшін
Жақында Италияның Лидо Адриано курортты қаласында өткен әсемдік пен таланттар байқауына дүниенің әр түкпірінен елуден аса жас талапкерлер қатысты. Байқаудың ерекшелігі сол – жүлде біреу болды. Оны қостанайлық “Триумф” балалар модасы театрының кішкентай мүшелері Айдана Бермұхамбетова, Жазира Жұрқабаева, Алина Мұхамеджанова қанжығаларына байлап қайтты. Біздің кішкентай арулар сахнаға үш рет шыққан. Олар алғашында Қостанай қаласындағы “Ханым” сән ательесі тіккен “Ақбота” коллекциясынан қазақ қыздарының ұлттық киімін көрсетіпті. Байқауға қатысушылар мен қонақтар, беделді қазылар алқасы қос етек көйлек пен үкілі бөріктің, қамзолдың әдемілігі мен қазақ қолөнерінің құдіретіне таңғалыпты. Қыздардың жүлдені иемденуіне осы ұлттық костюмге берілген баға мен қонақтар ықыласы көп ықпал етіпті. Енді “Триумф” балалар модасы театрының тағы бір мүшесі алты жасар Айдана Омарова Францияға жүргелі отыр. Ол атақты француз модельері Пьер Карденнің резиденциясында өтетін халықаралық мода фестиваліне қатыспақ. Бұл жолы да “Ханым” сән ательесі Айданаға арнап “Ақбота” коллекциясынан ұлттық костюм дайындады. Кетер кезде дизайнер Татьяна Тайшықова Айданаға халқымыздың өнерін паш етіп, табыспен оралуына тілек білдірді. Нәзира ЖӘРІМБЕТОВА, Қостанай. Суретте: Айдана Омарова дизайнер Татьяна Тайшықовамен бірге.