Үлгі

Тәуелсіздік құрдасы атанған білім ұясы жылдан-жылға өркен жайып келеді Қалалық әкімдік еліміздің тиісті заңнамаларына сәйкес жас ұрпаққа сапалы білім беру қызметін жақсарту мақсатында қаладағы бір қа­зақ және бір орыс мектеп-гим­назиясы ендігі жерде тек гимназия бо­лып аталсын деген қалалық білім бөлімінің шешімін бекітіп берді. Сөйтіп, бұрынғы №37 жалпы орта білім беретін мектеп-гимназия” мемле­кеттік мекемесі – “Семей қала­сының №37 гимназиясы” мем­ле­кеттік мекемесі болып қайта құрылды. Аталған білім ордасын тәуел­сіз­дік же­місі десек, артық айт­қандық емес. Өйткені, ол қо­ғам­дық пікірге орай 1992 жыл­дың жа­зында осында жа­ңадан ашыл­ған тұңғыш қазақ мек­тебі. Бұл енді айт­қанға ғана оңай. Әйтпесе тә­уел­­сіз­діктің елең-ала­ңын­­дағы қарбалас шақ­та бір жазда жаңа­дан мек­­теп салып, оны қа­тарға қосу оңайға түс­пе­ген. Со­лайша атал­ған жыл­дың күзінде 700 оқу­шыға есеп­тел­ген ар­на­йы типтік жоба­дағы жаңа мектеп іске кірісіп кеткен. Елдің тілегімен салынған сол білім ордасы бүгінде өзіне жүктелген міндетті абыроймен атқарып келеді. Мәселен, қазірде мұнда 119 ұстаз еңбек етіп жатса, соның 23-і –  жоғарғы, 51-і –  бі­рін­ші, ал 27-і екінші санатты мұ­ға­лім. Олардың ішінде 8 ұстаз Қа­зақстан Республи­ка­сының оқу-ағарту ісінің озық қызметкері белгісімен, 10-ы Білім және ғылым ми­нистрлігінің құрмет грамота­сы­мен марапатталған. Мектепте гим­назиялық сыныптар жыл сайын арта түсті. Айталық, олардың саны бұдан үш жыл бұрын 17 сынып болса, бұрнағы оқу жылында – 21, ал биылғы жылы 24 сы­ныпқа жетті. Соның нәтижесінде пәндерді те­рең­­дете оқытуға мүмкіншілік ашылды. 2003-2004 оқу жылынан бастап аталған білім ордасы “өзін-өзі тану” пәнін оқы­тудың экспе­ри­мент­тік алаңы болып табы­лады. Мек­теп ұжымының мақсатты және жос­пар­лы жұмысының нәтижесінде оның қала мектептері арасындағы рейтин­гісі жылдан-жылға көтеріліп келеді. Айталық, осыдан үш жыл бұрын бұлар қала бойынша екінші орынды иеленсе, міне, соңғы екі жылдан бері бірінші орыннан көрінуде. Сөз басында бұл білім ордасы­ның 700 оқушыға арнап салын­ға­нын айттық. Ал қазірде мұнда оқу­шы саны одан екі еседен астам артық. Мұның өзі осында оқуға тілек білдірушілердің уақыт өткен сайын арта түсіп келе жатқанын көр­сетсе керек. Солай дей тұр­ғанмен, оқушы санының шамадан тыс көп болуы түрлі қиындық­тар­ды туындататыны да рас. Абырой бол­ғанда соған қарамастан, соңғы үш жыл­дағы мұндағы білім сапасы 58 пайыздан 68 пайызға көтеріліп отыр. Соған сәйкес Ұлттық бір­ың­ғай тестілеу нәтижесі де көптеген көрсеткіштер бойынша жыл өткен сайын жоғарылай түсіп келеді. Соған орай облыстық білім бас­қармасының бастығы Е.Нәбиев мыр­заның атынан мектеп ди­ректоры Ж. Стамбековтің атына келіп түскен алғыс хатынан үзінді келтіре кетсек, артық болмас деп ойлаймыз. “Сізге және сіздің ұжы­мыңызға шығарма­шы­лық еңбек­те­ріңіздің арқасында Ардақ Ахатова және Айбек Молдабеков сынды оқу­­шыларыңыздың үстіміздегі жылғы жал­пы білім беретін пәндер бойынша оқушы­лар­дың респуб­ли­калық ғылыми жарыс­та­рының және “Жыр алыбы – Жамбыл” атты республикалық айтыстың жүлде­герлері атанып, жоғары нә­ти­жеге жеткені үшін алғыс біл­ді­ремін.” Мектеп басшысы атына осын­дай мазмұндағы хат  Қазақстан – Британ техникалық универ­си­те­тінің басқарушы директоры Ф.Гаджиев пен Л.Н.Гумилев аты­ндағы Еуразия Ұлттық универ­си­теті заң факультетінің деканы Ш.Тілепинадан да келіп түсіпті. Оның екеуі де өздерінде үздік оқып жатқан осы мектептің тү­лек­те­ріне жоғары деңгейде білім беріп, жо­ғары оқу орнына қажетті дәре­жеде дайындағаны үшін аталған білім ордасына алғыстарын білдіріпті. Мектеп оқушыларының білім көр­сеткіштерін айқындайтын мұн­дай жарқын мысалдарды одан әрі жалғастыра беруге болады. Айталық, мектеп түлектері қалалық және облыстық пән олимпиа­да­ларында жыл өткен сайын жеңіс тұғы­ры­нан көптеп көрінуде. Мұ­ның сыртында олардың бір тобы түрлі деңгейде өткізіліп келе жатқан интеллектуалды кон­курс­тарда жоғары көрсеткіштерді тұрақты түрде иеленуде. Ал оған мектептің материалдық-техникалық базасының жылдан-жылға жақсара түсіп келе жатқандығы да бірден-бір себеп пе дейміз. Мәселен, фи­зика, хи­мия, математика, биология, тарих ка­би­неттерінде интерактивті қондырғылар орнатылған. Ал өткен жылы жаңа ком­пью­тер сыныбы алынып, іске қосылды. Сонымен бүгінгі күні тәуел­сіз­дік гим­назиясы атанып отырған білім ордасынан осы уақытқа дейін қанаттанып ұшқан түлектер ішінен  35-і  “Алтын белгі”, ал 55-і “Үздік ат­тестат” иегері атаныпты. Мұның сы­ртында 7 түлек қазіргі күні “Болашақ” бағдарламасымен алыс шет елдерде білім алып жатқан кө­рі­неді. Соның бәрі мектеп ұжы­мының, оның ішінде осы білім ор­дасын ұзақ жылдан бері бас­қа­рып келе жатқан Жұмағазы Стам­бе­ковтің қажырлы еңбегі екендігіне ешкімнің дауы болмаса керек. Енді, міне, кешегі тәуелсіздік мектебі тәуелсіздік гимназиясына айналып отыр. Соған орай қалалық білім беру бөлімінің бастығы Мәнсура Дүйсембаева ханымнан гимназия басшысының атына арнайы хат келіп түсіпті. Бұл хатта мектеп мәр­те­бе­сінің өзгеруіне байланысты ата-аналармен түсін­діру жұмыстары тиянақты түрде жүр­гізіліп, гимназияға қабылданбай қалатын оқушыларды басқа білім беру меке­ме­леріне орналастыруды қатаң қадағалауды тапсырыпты. Бұл да жөн сөз. Кешегі тәуелсіздік мектебінің, бүгінгі тәуелсіздік гимназиясының  мәртебесі бұрын­ғыдан да жоғарылай түсуі заң­дылық. Дәулет СЕЙСЕНҰЛЫ, Семей.