ҚЫЗЫЛОРДА. 21 мамыр. Қызылорда облысының кәсіпкерлер палатасы білім басқармасымен бірге аймақ мектептері оқушыларының арасында кәсіби бағдар беру шараларын жалғастыруда. Бұл туралы egemen.kz тілшісі хабарлады.
Қызылорда қаласындағы Назарбаев зияткерлік мектебінің 9-11 сынып оқушылары облыстық телекоммуникация дирекциясы мекемесінің жұмысымен танысты. Оқушылар iD Center-де болып, телекоммуникация саласындағы заманауи, сұранысқа ие мамандықтар жөнінде мағлұматтар алып, жаңа технологияларды пайдалану арқылы өмір сүру сапасын жақсартуға болатынын білді.
iD Center – тұрғындардың «Қазақтелеком» АҚ жоспарлап отырған жаңа технологиялар, қызмет көрсетулер мен сервистер туралы ақпараттандырылуын арттыратын бірегей жоба.
«Бүгін біз интернет желісі және «Қазақтелеком» АҚ-ның қызметтері туралы көптеген мәліметтер алдық. Әсіресе, бізді «iD Net» жоғары жылдамдықты интернет желісінің қызметі қызықтырды», – дейді оқушылар.
Кездесу соңында мекеме қызметкерлері оқушыларға жаңа ақпараттық технологиялық саласына қатысты интеллектуалдық ойындар ұйымдастырып, белсенді қатысушыларға «Қазақтелекомның» атынан сыйлықтар табыс етті.
Ержан Байтілес.
Дерек, сурет: egemen.kz.
