Қазақстан Республикасының Мемлекеттік хатшысы Гүлшара Әбдіқалықова Халықаралық еңбек ұйымының Шығыс Еуропа мен Орталық Азия елдеріндегі Өңірлік бюросының директоры Хайнц Коллермен кездесті. Г.Әбдіқалықова Халықаралық еңбек ұйымының (ХЕҰ) БҰҰ жүйесіндегі еңбек қатынастарын реттеу мәселелері жөніндегі халықаралық беделді ұйым ретіндегі рөлін атап өтті. Мемлекеттік хатшы Қазақстанның бұл халықаралық ұйыммен ынтымақтастыққа айрықша мән беретінін және ХЕҰ-ның негізгі іс-шараларына жыл сайын белсенді түрде қатысатынын айтты. Соның ішінде биылғы маусымда өтетін ХЕҰ Бас конференциясы 104-сессиясының тақырыбы маңызды екеніне ерекше тоқталды.
Сонымен қатар, тараптар еңбек қатынастары саласындағы Қазақстан мен ХЕҰ ынтымақтастығының келешегін талқылады. Мемлекеттік хатшы Мемлекет басшысы ұсынған бес институттық реформа мемлекеттік институттарды сапалы жаңартуға, экономикалық бағдарламалардың тиімділігін арттыруға, мемлекеттік қызметтер сапасын жақсартуға және кең ауқымды инфрақұрылымдық жобаларды жүзеге асыруға бағытталғанын атап көрсетті. Г.Әбдіқалықова «Нұрлы Жол» мемлекеттік бағдарламасы экономиканың орнықты өсуін қамтамасыз ету, бүгінгі жұмыс орындарын сақтау және сыртқы нарықтағы ахуалдың нашарлауы жағдайында жаңаларын ашу үшін ерекше мәнге ие екенін айтты.
Аталған міндеттерді іске асыру ел экономикасын жандандырады, икемділікті арттырады және халықтың жұмыспен қамтылуын барынша қамтамасыз ете отырып, кәсіпкерлік проблемаларының шешілуіне мүмкіндік туғызады. Кездесу барысында, сонымен бірге, Қазақстанда жастарды жұмыспен қамтамасыз ету үшін Ұлттық іс-қимыл жоспарын қабылдау, сондай-ақ, Еңбекті қорғау және жұмыс күшінің икемділігі жөнінде зерттеу жүргізудің ұлттық бағдарын әзірлеу жөнінде ХЕҰ-ның техникалық қолдау көрсетуі мәселелері қаралды. Кездесу аясында журналистерге сұхбат берген Халықаралық еңбек ұйымының Шығыс Еуропа және Орталық Азия елдеріндегі Өңірлік бюросының директоры Х.Коллер биылғы маусымда өтетін ХЕҰ Бас конференциясының 104-сессиясында ұйымға мүше 185 елдің өкілдері қатысып, онда болашақта еңбек нарығында қалыптасатын жағдайлар, еңбекпен қамту мәселелері қозғалатынын жеткізді. «VIII Астана экономикалық форумында көтерілетін мәселелердің бірі – халықты еңбекпен қамту саясаты. Бұл – халықаралық қоғамдастықтың күн тәртібінде тұрған өзекті мәселе. Қазіргі таңда әлем елдерінің басым көпшілігінде жұмыссыздық ушығып тұр. Мәселен, әлемде 200 млн. адам жұмыссыз. Бұл өткен жылғы көрсеткішпен салыстырғанда 30 млн. адамға көп. Демек, бұл мәселе біз үшін айрықша маңызды, сол себепті де ол Астана экономикалық форумының алаңында жан-жақты талқыланады», – деді Х. Коллер.
Ләйла ЕДІЛҚЫЗЫ, «Егемен Қазақстан».
