Қазақстан Республикасы Президенті жанындағы Мемлекеттік басқару академиясы мемлекеттік тілді оқытуды жетілдірудің жайына жеткілікті көңіл бөле бастады. Осыған орай мұнда мемлекеттік органдарда мемлекеттік тілді оқытуды жетілдіру мәселелерін талқылаған республикалық ғылыми-әдістемелік кеңес болып өтті.
Аталған іс-шараға Президент Әкімшілігінің, Президенттің іс басқармасының, есеп комитетінің, тілдерді дамыту және қоғамдық-саяси жұмыс комитетінің, Мемлекеттік қызмет істері және сыбайлас жемқорлыққа қарсы іс-қимыл агенттігінің, Әділет, Ұлттық экономика, Денсаулық сақтау және әлеуметтік даму министрліктерінің ғылыми-әдістемелік кеңесінің мүшелері мен мемлекеттік тілге қатысы бар мамандары қатысты.
Кеңес төрағасы, академия ректоры Болатбек Әбдірасилов өзінің кіріспе сөзінде талқыланып отырған мәселенің маңыздылығы мен мемлекеттік қызметшілерді оқытудың мазмұны мен технологияларын бірізді бағытта жүргізудің өзектілігін атап өтті.
Академияның аударма және мемлекеттік тілді оқыту орталығының жетекшісі, профессор Н.Төленбергенова өз баяндамасында 2011-2014 жылдар аралығында мемлекеттік органдарда қазақ тілін оқытқан тіл орталықтардың оқыту әдістемелері сапасына мониторинг жүйесі арқылы тоқталып, аталған бағыттағы өзекті проблемаларды атап көрсетті. Сонымен қатар, академияның ресми стильді оқыту тәжірибесіне жалпылама сипат бере келіп, типтік бағдарламаға кірген 6 семинардың бағыты мен бағдарына шолу жасап өтті. Ал аталмыш семинарлар ресми қазақ тілі және ресми мәтінге дайындық, ресми жазылым және мемлекеттік тілде іс қағаздарын жүргізу, құжаттама жасау, құжаттаманы басқару және мемлекеттік тілде іс қағаздарын жүргізу, персоналды басқару және мемлекеттік тілде іс қағаздарын жүргізу, сөз мәдениеті және шешендік өнер, мемлекеттік қызметшінің тілдік құзыреттілігі тақырыптарын қамтиды. Баяндамашы өз сөзінде тілді үйрету технологиясына тоқтала отырып, «Ресми қазақ тілі» – Официальный казахский язык семинарларының типтік бағдарламасын ұсынды.
Кеңес жұмысына Президент Әкімшілігі Жалпы бөлім редакциялық сараптама және актілерді шығару секторының меңгерушісі Бекзада Сағын, мемлекеттік қызмет істері және сыбайлас жемқорлыққа қарсы іс-қимыл агенттігі мемлекеттік қызметті өткеру басқармасының бас инспекторы Алма Құлжанбекова, Мәдениет және спорт министрлігі тілдерді дамыту және қоғамдық-саяси жұмыс комитеті тіл саясатын талдау және монитринг басқармасының басшысы Толқын Исақова, республикалық бюджеттің атқарылуын бақылау жөніндегі есеп комитеті әкімшілік және қаржы бөлімі мемлекеттік тілді дамыту секторының меңгерушісі Фарида Сақыпова, Әділет министрлігі ішкі әкімшілік департаменті мемлекеттік тілді дамыту және аударма басқармасының басшысы А.Төлеуханова, Ұлттық экономика министрлігі мемлекеттік тілді дамыту және редакциялау басқармасының басшысы Г.Қисықова белсене қатысты. Сөйлеушілер талқыланып отырған мәселенің өзектілігі жайлы айтып, типтік бағдарламаны жоғары бағалады, академияның мемлекеттік қызметшілердің тілдік біліктілігі мен құзыреттілігін бірізді типтік бағдарлама арқылы көтеру туралы ұсынысын қолдайтындары жайлы баяндады.
Іс-шараға онлайн режімі арқылы кеңес мүшелері, атап айтқанда, өңірлік қайта даярлау мен біліктілікті арттыру орталықтарының директорлары: Жамбыл облысынан Дүйсенбек Әбдірайымов, Ақмола облысынан Әлібек Баймағамбетов және Ақтөбе облысынан Александр Дубовенко араласты.
Кеңес мүшелері мен қатысушылар еліміздің барлық орталығы мен өңірлерінің мемлекеттік қызметшілерін оқыту жүйесіне енгізілетін «Ресми қазақ тілі – Официальный казахский язык» тақырыбындағы мемлекеттік қызметшілердің тілдік біліктілігін арттыратын семинарлардың типтік бағдарламасын бекітті.
Серік ПІРНАЗАР,
«Егемен Қазақстан».
