Мәдениет және спорт министрі балуандармен кездесті

АСТАНА. 28 тамыз. Астанада Мәдениет және спорт министрі Арыстанбек Мұхамедиұлы дзюдодан Қазақстан ұлттық құрама командасының спортшыларымен кездесті. Бұл туралы egemen.kz тілшісі хабарлады. Кездесуде министр дзюдодан өтіп жатқан әлем чемпионатының алғашқы күні ел қоржынына алтын медаль салған Елдос Сметов пен күміс жүлдегер Рустам Ибраевқа алғысын білдірді. Сондай-ақ, ол татами төріне шығатын басқа спортшыларға сәттілік тіледі. Ведомство басшысы әлем чемпионаты сияқты жарыстар бірінші кезекте Елбасы Нұрсұлтан Назарбаевтың тікелей қамқорлығының арқасында жасалып жатқан шара екенін атап өтті. Осы тұрғыдан алғанда жастар, соның ішінде спортшы жастардың Мемлекет басшысының игі бастамаларын қолдап жүргендері қуантарлық жағдай екенін айтып, алғысын білдірді. Кездесуде спортшылар да Елбасының үлкен қамқорлығына алғыс сезімдерін жеткізді. Дастан Кенжалин. Дерек: Қазақстан Республикасы Мәдениет және спорт министрлігі. Сурет: egemen.kz