«Ұлыма хат» белорус тілінде шықты

Жақында Минск қаласында XXII халықаралық көрме-жәрмеңке өтті. Көрме барысында «Звязда» бас­па үйінде белорус тілінде жарық көрген Н.Келімбетовтің «Ұлыма хат» кітабының тұсаукесері өтті. Көрме қонақтары мен оқыр­мандармен кездесуді «Звязда» бас­па үйінің бас редакторы Алесь Кар­люкевич ашып, осы медиа-холдингтің қазақстандық жобалары туралы әңгімеледі.  2011 жылы Минскіде Миколы Метлицкий белорус тіліне аударған Абайдың «Жазық дала» атты өлеңдер жинағы жарыққа шықты. Сонымен бірге, орыс тілінде қазіргі қазақ және белорус әдебиеттерінің «Созвучие сердец: Беларусь – Казахстан» сериясымен «Не ведая границ» антологиясы басылып шықты. Соңғы басылымның құрастырушысы – атақты белорус ақыны Алесь Бадак. «Звязда» баспа үйі – жазушылардың жыл сайын Минск қаласында өтетін «Көркем әдебиет – өзара табысу жолы» халықаралық дөңгелек үстелінің құрылтайшысы. Әр жылдары Қазақстанның жазушылары Валерий Михайлов, Қайрат Бақбергенов, Любовь Шашкова, Райхан Мәженқызы, Светлана Ананьева осы дөңгелек үстелге қатысып жүр. Өткен жылы «Звязда» баспа үйі Немат Келімбетовтің «Үміт үз­гім келмейді» атты кітабын басып шы­ғарды. Белорус тіліне Алесь Кар­люкевич пен Алесь Бадак аударды. Биылғы жылы Н.Келімбетовтің «Ұлыма хат»  деген атпен бір томдығы жарыққа шықты. Аударғандар – Алесь Карлюкевич пен Геннадий Авласенко. Аудармашы Алесь Бадак тұсаукесер барысында көрнекті қазақ жазушысы, әдебиеттанушысының шығармашылығы туралы өзінің ой пікірімен бөлісті. Тұсаукесерде «Художественная литература» баспасының директоры Григорий Пряхин, филология ғылымдарының кандидаты Светлана Ананьева сөз сөйледі. Өзінің Немат Келімбетовке арнаған өлеңін әзербайжан ақыны Чингиз Али оглу оқыды. Немат Келімбетов қорының өкілі Райхан Мәженқызы Белорус Ұлттық кітапханасына қазақ ғалымы және жазушысының әлемнің әртүрлі мемлекеттерінде басылған «Үміт үзгім келмейді», «Ұлыма хат», «Күн­шілдік» кітаптарын тапсырды. Вероника ЛОЗОВСКАЯ. Минск қаласы.