Бала бақытты болсын десек...

Алматыда “Алматы облысында ауыл шаруашылығы жұмыстарына тартылған жұмысшылардың еңбек жағдайлары” атты дөңгелек үстел бо­лып өтті. Халықаралық еңбек ұйым­дарының (ХЕҰ), Ішкі істер, Білім және ғылым министр­лік­терінің, Қа­зақстандағы Қырғыз Рес­публикасы бас консулдығы өкіл­дерінің қаты­суымен өткізілген жиында бүгінгі таңдағы еңбек көші-қонына қатысты бірқатар мәселелер күн тәртібіне қойылды. Жиынды кіріспе сөз сөйлеп ашқан Қазақстан Тауар өн­діру­шілері мен экспортаушылар ода­ғының пре­зи­денті Николай Радос­товец еңбек ресурстарын басқару және еңбек көші-қонын бақылау саласымен қатар, балалар еңбегін пайдалануды болдырмау бағытын­дағы іс-шара­лар­ды одан әрі жетілдіру мәсе­ле­леріне тоқталды. Шын мәні­сінде де күн тәртібіне қойылып, көп­шілік талқысына салынып отырған бұл жағ­дай күрделі әрі ауқымды екен­дігі жасырын емес. Жиында сөз алған Еңбек және халықты әлеу­мет­тік қорғау министрлігінің Әлеу­меттік қорғау және бақылау жө­нін­дегі комитеті төрағасы Серікқали Бисақаев ауыл шаруашылығында бала еңбегін пайдалануға жол бермеу қажеттігін атап айтты. – Балалық шақ – адам өмі­рін­дегі ерекше кезеңі, сәбидің талап дең­гейінде дамып, өсіп-қалып­тасуының маңызы зор. Өкінішке орай, бала еңбегін пайдалану ТМД елдері ішінде Қазақ­стан­да да кездесуде. Бір құптарлығы, соң­ғы жылдарда Қазақстанда әлеу­меттік-тұрмыстық жағдайдың жақ­саруына байланысты балалар ең­бе­гін пайдалану айтарлықтай тө­мен­деді, – дейді Серікқали Ғұмарұлы. Бүгінде Қазақстан миграциялық басқару үрдістері саясатын эконо­ми­калық қажеттіліктерге, ішкі ры­ноктың мүддесіне орай жүргізуде. Үкімет көші-қон мәселелерін ай­тар­лықтай деңгейде реттеуге мүд­де­лілік танытуда. Мәселен, 2008 жылы Еңбек және халықты әлеу­мет­тік қорғау министрлігі Алматы облысы үшін шетелдік жұмыс кү­шін тартуға 10914 бірлік квота бел­гілеген еді. Биылғы 2010 жылдың 1 шілдесіндегі дерек бойынша Қа­зақ­стан аумағында барлығы 29,2 мың шетелдік жұмысшылар еңбекпен қамтылған. Олардың арасында 437 адам Қырғызстан мемлекетінің азаматы. Республикада 2007 жылдан бас­тап Халықаралық еңбек одағымен бірлесіп балалар еңбегін қорғау жөнінде кең көлемдегі акциялар өткізу іс-шараларының жоспары бекітілген болатын. Соған орай, Тараз қаласында Қазақстан, Өзбек­стан және Тәжікстан мемлекет­тері­нің әлеуметтік әріптестерінің қа­тысуымен балалар құқын қорғау тақырыбына арналған халықаралық семинар ұйымдасты­рылды. Бала ең­бегін қорғауға арнал­ған кең кө­лемдегі акция аясында республика ұйымдарындағы кешенді тексеріс­тер бірқатар олқылықтарды да айқындады. Елімізде ана мен бала жағдайын жақсарту бағытында ауқымды іс-шаралар жүзеге асырылуда, бұл орай­да қоғамдық қорлардың да ай­тарлықтай үлес қосуы көп нәрседен хабар берсе керек. “Алматы облы­сындағы “Бота” қоры өткен жыл­дан бастап балаларға арналған әлеу­меттік орталықтың жұмысын одан әрі жетілдіру үшін 3 миллион теңге қаражат бөлді. Келешекте 15-18 жас аралығындағы жасөс­пі­рім­дерді арнайы кәсіпке бағыттауға ар­налған қысқа мерзімді тегін курс­тар ашу жоспарлануда”, дейді Алма­ты облысы Балалар құқын қорғау департаменті­нің директоры Гүлнар Ермекбаева. Қорыта айтқанда, балалардың ке­лешекте қоғамның лайықты аза­маты болып өсуі бүгіннен баста­латындығы ешқашан естен шықпауы тиіс. Бақыт БАЛҒАРИНА. АЛМАТЫ.