Кеше Парламент Сенатының Төрағасы Қасым-Жомарт Тоқаев БҰҰ Бас хатшысының Арнаулы өкілі, БҰҰ-ның Орталық Азия үшін Аймақтық бітімгерлік дипломатия орталығының басшысы Мирослав Енчаны қабылдады, деп хабарлады Парламент Сенатының баспасөз қызметі.
Кездесу барысында Қазақстанның БҰҰ-мен ынтымақтастығын одан әрі дамыту мәселелері бойынша пікір алмасылды.
Қазақстан Республикасы мен БҰҰ-ның өзара белсенді іс-қимылын атап өте келіп, Төраға біздің еліміздің Ұйым институттарымен байланыстарын дамытуға мүдделі екеніне тоқталды. “Уақыт Орталық Азия аймағында БҰҰ-ның болуы қажеттігін дәлелдеп отыр”, – деді Қ.Тоқаев.
Төрағаның пікірінше, Жаппай қырып-жою қаруынан бас тартудың Бүкілдүниежүзілік күніне арналған конференцияға БҰҰ-ның құрылымдық бөлімшесі басшысының қатысуы Ұйымның қарусыздану және қаруды таратпау саласындағы Қазақстан басшылығының бастамаларын қолдайтынын көрсетіп отыр.
Қырғызстандағы жағдайды талқылау барысында Қазақстан ішкі саяси тұрақтылық пен ұлттық экономиканы дамытуды қамтамасыз етуге бағытталған Қырғызстанның жаңа басшылығының бағдарын қолдайтынын атап өтті. Қ.Тоқаев ЕҚЫҰ саммитіне келуі күтіліп отырған БҰҰ Бас хатшысы Пан Ги Мунға ізгі тілектестігін жолдады.
М.Енча БҰҰ-ның Аймақтық бітімгерлік орталығының Қазақстанмен өзара іс-қимылының деңгейін жоғары бағалады және Орталыққа қолдау білдіргені үшін Сенат Төрағасы Қ.Тоқаевқа ризашылық білдірді. “Егер де мұндай аймақтық құрылым болмаса, Орталық Азия өңірінде әрекет ету күрделі болатын еді”, – деді бөлімше басшысы.