27 Тамыз, 2010

Қазақ-татар ынтымақтастығы алдағы кезде де өркендей береді

562 рет
көрсетілді
4 мин
оқу үшін
25 тамызда Ақордада Елбасы Нұрсұлтан Назарбаев Татарстан Республикасының Президенті Рустам Миннихановпен кездесті, деп хабарлады Қазақстан Республикасы Президентінің баспасөз қызметі. Мемлекет басшысы Р.Минни­ха­­новты Татарстан Республика­сы­ның Президенті қызметіне ресми кірісуімен құттықтады және Қа­зақ­станның Ресей Федерациясының Татарстан тәрізді ірі өңірімен дос­тық пен сенімге негізделген дәс­түр­лі ынтымақтастығы қазіргі қарқы­нын жоғалтпастан, одан әрі табыс­ты дами беретініне сенім білдірді. Кездесу барысында сауда-эко­номикалық, ғылыми-техникалық және мәдени ынтымақтастықты дамыту мәселесі талқыланды. Әріп­тестіктің перспективалы бағыттары ретінде мәшине жасау, мұнай және мұнай-химия салалары, ауыл ша­руашылығы, мәдени-гуманитарлық және ғылыми-техникалық ынты­мақ­тастық және өзге де салалар атап өтілді. Ынтымақтастықтың ма­ңызды бағыты инновация саласы болып табылады. Тараптар жол құ­рылысы және мұнай-химия сала­ларындағы бірлескен инновация­лық жобаларды іске асыру мүмкіндігін қарастырады. Сонымен қатар, Татарстан бас­шылығы қазақстандық астықты сатып алу ниетін білдірді. Қазақстанда “КамАЗ”, “Қазан тік­ұшақ зауыты” кәсіпорын­дары­мен бірнеше бірлескен жобалар табысты жүзеге асырылуда. 2008 жылы “КамАЗ-Инжиниринг” бір­лес­кен кәсіпорны 10,5 миллиард тең­генің өнімін шығарып, Қазақ­станның жүк көліктері рыногының 75 пайызын қамтамасыз етті. Қазақстан Республикасымен “Татнефть” ААҚ, “Нижне­камск­неф­техим” ААҚ, “Нижнекамск­шина” ААҚ, “КАМА” сауда үйі” ААҚ, “Казаньоргсинтез” ААҚ, “Альметьев құбыр зауыты” ААҚ және Татарстанның өзге де кәсіпорындары ынтымақтастық жасап келеді. Журналистерге арналған бри­фингте Татарстан Республикасы­ның Президенті Астана құры­лы­сының қарқынына таңданысын білдірді. – Мұнда жасалғанның бәрі де жоғары әлемдік деңгейде атқарыл­ған. Көптеген нысандардың әлемде баламасы жоқ. Біз мұнда келген сайын үйреніп қайтамыз, – деді Р.Минниханов. Татарстан Президенті Қазақстан экономикасын дамытудағы Нұр­сұлтан Назарбаевтың рөліне жоғары баға берді. Нұрсұлтан Назарбаев – біз үшін үлгі-өнеге. Бұл – пост­ке­ңес­тік кеңістіктегі Ұлт Лидерінің жар­қын мысалы, соның арқасында рес­публика гүлденіп, дағдарыстың бар­лық салдарларын табысты ең­сере білді. Нұрсұлтан Әбішұлы – бұл тұлға, мемлекетті осындай ли­дер­дің басқарып отырғаны Қазақ­стан үшін бақыт, – деп атап көр­сетті Р.Минниханов. * * *

Елбасы Қабылдады

Мемлекет басшысы Нұрсұлтан Назарбаев Кеден одағына қатысушы мемлекеттердің ішкі істер министрлері: Ресей Федерациясынан – Рашид Нұрғалиевті, Беларусь Республикасынан – Анатолий Кулешовті, Қазақстан Республикасынан – Серік Баймағанбетовті қабылдады, деп хабарлады Қазақстан Республикасы Президентінің баспасөз қызметі. Министрлер Мемлекет басшысына Астанада өткен Кеден одағына қатысушы мемлекеттер Ішкі істер министрлері кеңесінің қорытындылары, атап айтқанда, Қазақстан, Беларусь және Ресей құқық қорғау органдарының ұйымдасқан қылмысқа, есірткі бизнесіне және заңсыз көші-қонға қарсы күрестегі, бірыңғай кедендік кеңістікте ақпараттар алмасудағы ынтымақтастығын дамыту мәселесі туралы баяндады. Журналистерге арналған брифингте Рашид Нұрғалиев пен Анатолий Кулешов Қазақстанда жүргізіліп жатқан құқық қорғау жүйесін реформалауға жоғары баға берді. – Бізде, Ресейде де ішкі істер министрлігін жаңғырту ісі жүргізілуде. Онда да бірінші міндет – өзге құрылымдарға еш ауыртпалықсыз беру арқылы тән емес міндеттерден босатып, бар назарды қылмыспен күреске шоғырландыру. Мен Қазақстанның құқық қорғау жүйесін жаңғыртудың негізгі бағыттарын қолдаймын, – деді Ресей ішкі істер министрі. Р.Нұрғалиев реформа Қазақстанның құқық қорғау құрылымдары жұ­мы­сының ашықтығы мен нақтылығына мүмкіндік туғызатынын атап өтті. Қазақстанда жүргізіліп жатқан реформаның басты мақсаты – полиция жұмысын жақсарту. Бұл ішкі істер органдарының жұмысын ел халқына етене етуге жол ашады, – деп атап өтті А.Кулешов.