Жас фотосуретшілер көрмесі

“Бәйтерек” монументінің жанында Конституцияның 15 жылдығына орай “Астана в объективе – Астананың айшықты көріністері” атты талантты жас фотосуретшілердің көрмесі өтті. “Алтын күн” қоғамдық қорының ұйымдастыруымен өткен бұл көрмеге жеті фотосуретшінің 62 жұмысы қойылды. Шараның басты мақсаты – Елбасы Н.Назарбаевтың 2010 жыл­­ғы Жолдауына сәйкес шығар­машыл жастардың еңбектерін көрсетіп, оларға қолдау білдіру. Конституцияның 15 жылдығына орай арнайы ұйымдастырылып отырған аталмыш іс-шараның ма­ңызы ерекше. Көрмеге қойылған талантты фотосуретшілердің бас­ты тақырыбы – әсем Астананың зәулім ғимараттары, Есіл бойы­нан орын тапқан таңғажайып саябақтар, қала тұрғындары мен жалындаған арманшыл жастар­дың фотосуреттері. “Аталмыш шараны ұйымдас­тыру үшін осыдан бір ай бұрын жас фотосуретшілерге арналған конкурс жариялаған болатынбыз. Конкурс нәтижесінде бізге 300-ден аса фотосурет келіп түсті. Осы­лардың ішінде ең сапалы әрі кәсіби тұрғыда бағаланған фото­су­реттерді біз бүгін сіздердің алда­рыңызға қойып отырмыз. Бұл орайда біздің ұстанған бағытымыз – талантты жастардың жұмысын кең аудиторияға паш ету”, –дейді “Алтын Күн” қоғамдық қорының президенті Еркебұлан Кенже­болатов. Айта кетейік, “Алтын Күн” қоғамдық қорының бұл күнгі қол­даныстағы жобалары шығар­машыл жастар аудиториясына арналған. Елордамыздың шығар­ма­шыл жастарының бұл еңбекте­рін қала тұрғындары мен қонақ­тары тамашалады. Көрме бір апта бойына жалғасып, апта соңында жас фотосуретшілерге ұйымдас­ты­рушылар тарапынан дипломдар беріледі деп жоспарланып отыр. Жұлдыз БАЙДІЛДА, Еуразия ұлттық университетінің студенті.