Жарыстар күнделігі

Мини-футбол. Сербияда өткен әлемнің студенттер арасындағы XІІ чемпионатында негізін Қа­рағандының “Тұлпар” командасы құрайтын Қазақстан құрамасы 6-орынға табан тіреді. Қазақстандық студенттері өз тобында Қытай, Бра­зилия және Словакия коман­да­ларын тиісінше 7:1, 3:2, 7:0 есеп­терімен ұтып шықты. Ал ши­рек финалда алаң иелері – серб­терден 4:5 есебімен жеңілуге мәж­бүр болды. Содан кейін поляк­тар­мен 5-6 орындар үшін болған шайқасты әуелі 2:2 есебімен тең аяқтап, екінші рет өткізілген кез­десуде 2:3 болып жеңіліп қалды. Ал қорытын­ды нәтижеде ресейлік­термен бол­ған финалдық айқаста 3:2 есебімен алда болған Бразилия құрамасы бірінші орынға шықты. Үшінші орын – Сербия, төртінші орын Украина құрамаларына бұйырды. Хоккей. Өскеменде өткен Қа­зақстан кубогы үшін жарыста Руд­ныйдың “Горняк” команда­сы­ның бағы жанды. Кенді қаланың хок­кейшілері финалда Қараған­ды­ның “Сарыарқасынан” 3:0 есе­бі­мен басым түсті. Үшінші орынға Аты­раудың “Бейбарыс” коман­да­сын 5:2 есебімен ұтқан Өске­мен­нің “Каз­цинк-Торпедосы” орналасты. Волейбол. Алматыда әйелдер командалары арасында еліміздің Ку­богы үшін сайыс өтіп жатыр. Осы кезге дейін үш турдың ойын­дары ойналды. Оның қоры­тын­ды­сы бойынша “Қарағанды”, “Шы­ғысСвинецСтрой”, “Металлург”, “Астана-2”, “Грация KZ”, “ЦСКА-Алматы” командалары ширек финалға шығып, жартылай финалдың 4 жолдамасы үшін күресетін болды. Жеңіл атлетика. Қазақстан­дық Ольга Рыпакова Бельгияның Брюссель қаласында өтіп жатқан жеңілатлетикалық “Бриллиант лиганың” соңғы кезеңінде үш се­кі­рістің жалпы қорытындысы бой­ынша екінші орынды жеңіп алды. Лига чемпионы атағына кубалық Ярхелис Савинье қол жеткізді. Оның кезеңдерде жинаған ұпайы біздің Ольгамен бірдей шықты (22). Алайда, кезеңдердегі бас жүл­десінің саны (4) жағынан басым­дық танытып, бірінші орынға лайықты деп табылды. Олимпиада. Сингапурде мәреге жеткен жасөспірімдер арасындағы бірінші Олимпиялық ойындардың қорытындысында Қазақстан жас түлектері командалық 24-ші орын­ға ие болды. Бірінші орын 24 ал­тын медаль алған Қытай команда­сы­ның еншісінде кетсе, 18 бірінші орны бар Ресей құрамасы екінші болды. Үшінші орынға 11 бас жүл­демен Оңтүстік Корея спорт­шы­лары орналасты. “Егемен-ақпарат”.