Уефа талабына сай стадион

Өскемендегі дені дұрыс деген “Восток” стадионының күйі кетіп, сұрқы қашқанына да біраз жылдардың жүзі болған-тын. Облысты басқарған талай басшы стадионды жөндейміз деп уәде бергенімен, ол орындалмай кел­ген еді. Өңір басшысы Б.Са­пар­баев стадионды аралап, оны жөн­деген жөн деп тапты. Ар­тынша “Қа­зақ­мыс” корпорация­сы басшыла­ры­мен уағдаластыққа қол қойған еді. Қазір мұнда құрылыс жұмыс­тары қызу жүріп жатыр. Бір кездері “Восток” спорт клубын ұзақ жылдар басқарған, қазір Өскемен қалалық мәслиха­ты­ның хатшысы Владимир Голова­тюк­тің айтуынша, ста­дионды жаңар­туға деп бөлінген 600 миллион теңге мәслихат депутатта­рының қатаң назарында екен. Батыс трибуна жабық болып, жаңа газон төселмек. Ұзындыққа және биіктікке секіру, басқа да алаң­дарға соңғы жабдықтар орнатыл­мақ. Қысқасы, жаңа стадион көпшілік жиі жиналатын орынға айналмақ. Оңдасын ЕЛУБАЙ, Өскемен.