Жеңісін елдік мерекеге арнады

Жасөспірімдер арасында өт­кен алғашқы Олимпиаданың қа­зақ­стандық тұңғыш чемпионы, грек-рим күресінің жас шебері Жә­нібек Қандыбаев өзінің же­ңі­сін ел Конституциясының 15 жыл­ды­ғына арнайтынын мәлімдеді. Бұған осы­нау мереке күні облыс орталы­ғын­да өткен салтанатты жи­ында бас қосқан жамбыл­дық­тар куә болды. Мереке қуанышын бөлісуге келген жұртшылықты Ата Заң ая­сында атқарылып жатқан өңірдегі игілікті істерімен, қол жеткен та­быс­тарымен құттықтаған облыс әкі­мі Қ.Бозымбаев Сингапур бе­л­­де­суінде қарсылас шақ келтірмей, жеңіске жеткен саңлақты ортаға шақырып, оған екі бөлмелі пәтер кілтін табыс етті. “Сүйер ұлың бол­са, сен сүй, сүйінерге жарар ол”. Мұның алдындағы күндері балуанды ел болып қарсы алу, оның құрметіне шашу шашып, ән салып, би билеп, дастарқан жаю шаралары да ұйымшылдықпен өткен болатын. Жас өрен белдесу өнеріндегі жан аямас жаттығуларын алдағы уақытта да үзбей жалғастыра оты­рып, 2012 жылы болатын Лондон Олимпиадасында да жеңіс тұғы­рынан көрінуге уәде берді. Көсемәлі СӘТТІБАЙҰЛЫ, Жамбыл облысы. Суретте: Сингапур Олимпиада­сының чемпионы Жәнібек әкесі Жұмасейіт Қандыбаевпен бірге.