Ынтымақтастыққа белсенді үлес

Кеше Мәжіліс Төрағасы Орал Мұхамеджанов Жапонияның Қазақстандағы Төтенше және өкілетті елшісі Сигэо Нацуиді дипломатиялық қызметінің аяқта­луына орай қабылдады, деп хабар­лады Мәжілістің баспасөз қызметі. Елші өз сөзінде Қазақстан мен Жапония арасындағы халықара­лық келісімдерді бекітуге Парла­менттің белсенді атсалысқанын атап өтті. Бірнеше келісімдерді заңдастырған құқықтық база қос мемлекеттің ынтымақтастығын нығайту үшін өте маңызды болды. Жуырда Жа­пония парламентші­лері Астанада болып қайтқаны белгілі. Олар Мә­жіліс үйіне келіп, әріп­тестерімен де кездесулер өт­кізді. Елші Жапония депутат­тары­ның үлкен ризашылық­пен аттан­ғанын мәлім етті. “Сіз екі жыл бойы Қазақ­стан­ды жан-жақты біле түстіңіз. Пар­ла­мент­тің қызметімен де жақы­нырақ танысып, біраз жұмыс­тар­ды бірге ат­қардыңыз. Парламент­аралық бай­ланыстың дамуына үлес қосты­ңыз. Еліміздегі нәти­желі қызметі­ңізге алғысымызды білдіреміз”, – деді О.Мұха­меджанов. “Мен екі жыл бойы жаңа әлем­ді танып-білгендей болдым. Қа­зақ­станның тарихы, халқының салт-дәстүрі менің жүрегімде үл­кен әсер қалдырды. Жапония тұр­ғындары әзірге Қазақстан жайлы аз біледі. Сондықтан жапон халқы Қазақ елін көбірек білуі үшін екі ел ара­сындағы байланысымызды жақсы деңгейге көтеруіміз керек. Сол секілді Қазақстан тұрғын­дары да Жапония жайлы тереңі­рек білгенін қалаймын. Туризм саласы әзірге баяу дамуда. Алды­мызда тұр­­ған мін­деттер аса ауқым­ды. Мүм­кін­ді­гіміз өте зор. Мен бұл ел­ден кетсем де, әркез Қазақ­стан­ның жетіс­тік­терін на­си­хаттап жү­ретін бола­мын”, – деді С.Нацуи. Кездесу соңында Мәжіліс Төр­ағасы өз әріптестері атынан елшінің Қазақстандағы мәртебелі  қызметіне ризашылығын жеткізе келіп, келешектегі жұмысында табысқа жете беруіне тілектестігін білдірді.