Отыз күн ораза ұстап, имандылық танытып, ибалылыққа бет бұрған бауырларымызға Л.Н.Гумилев атындағы Еуразия ұлттық университетінің басшылығы дастарқан ұйымдастырып, ауыз аштырды.
Рамазан айында ораза тұтып, ауыз бекіткен оқытушылар мен қызметкерлер, студент жастар бұл игілікті іске өздерінің дән ризалықтарын жеткізді. 600-ден аса ауыз бекіткен азаматтардың арасында ардақты ақсақалдар мен ақжаулықты аналар да аз болған жоқ. Сол секілді елордамыздағы киелі орындардың бірінен саналатын “Нұр Астана” мешітінің имамдары мен дін өкілдері қатысып, Жаратушымыздың өсиет-өнегесінен жан-жақты әңгіме қозғап, адамдық пен адалдық, азаматтық, иман жолындағы тазалық туралы ой өрбітті. Жастарға исламның қадір-қасиеті туралы кеңінен толғап, мұсылман әлемінің құндылықтары төңірегінде сұхбаттасты.
Осындай өнегелі іске ұйытқы болған білім ордасының басшыларының атынан оқу-әдістемелік жұмыс және стратегиялық даму жөніндегі проректор Дихан Қамзабекұлы 30 күн оразаның өз қуаты, адам бойына дарытар жақсылығы барын, Аллаға құлшылық етіп, ораза тұтқан барша жамағаттың, оның ішінде студент жастардың кеуделеріндегі сәуле мен ізгі ниетін білдіріп, олардың тілеген тілектері қабыл болсын, деді.
Жыл сайын осындай ауызашарды дәстүрге айналдырып келе жатқан оқу орнының жақсы ісі өзгелерге үлгі боларлық. Біз оразадан кейін де имандылық жолындағы тәлім-тәрбие мәселесін жалғастыра беретін боламыз, дей келіп, проректор ауызашарға жиналған қауымға университет әкімшілігі атынан жақсылыққа ұйытатын еңбектер мен ұлтымыздың ұлы ойшылы, хакім Абайдың екі томдық шығармалар жинағын сыйға тартты.
Сүлеймен МӘМЕТ.
* * *
Оразадағы оңды істер
Түркістан қаласының әкімі Қайрат Молдасейітовтің бастамасымен рамазан айында әлеуметтік жағынан аз қорғалған, көмекке мұқтаж отбасыларға жәрдем берілді. Алдымен көмекке мұқтаж 100 отбасы таңдап алынып, оларға бірнеше қап ұн, пісте май және үш тоннадан көмір берілді. – Түркістан – ел аузында қазақтың рухани астанасы әрі имандылық қаласы деп аталады, – дейді қала әкімі. – Сондықтан, ізгі бастамалардың осы қасиетті аймақта қолға алынуы заңды. Бір жолғы көмекпен, әрине, ешкімнің қабырғасын жаба алмаймыз. Бірақ, айлардың сұлтанында, айт күндері көмекке мұқтаж отбасылар ешкімге жалтақтамай қазанын көтере алады. Игі бастаманы ХҚТУ ректоры Лесбек Тәшімов, “Ақ жол” фирмасының президенті Сабыр Атаев, Әзірет Сұлтан музейінің басшылығы қолдаған. Жиында “Кентау” трансформатор зауыты” директорлар кеңесінің төрағасы Сейдулла Қожабаев ұжым атынан 200 мың теңге бөлінетіндігін айтты. Біз көмек берілген бір отбасының шаңырағына бас сұқтық. Ауғанстаннан тарихи Отанына оралған Құсейін баласы Афқан қарияның қолы қысқа. Жапырып жұмыс жасар азамат баласы жоқ. Мемлекеттік көмектің арқасында жан бағып отырған олар көмекке аса мұқтаж. Афқан қария қала басшылығына рахметін айтып, көзіне жас алды. Рамазан айы айлардың сұлтаны. Мұсылмандар үшін қасиетті ай. Дәулетті азаматтар осындайда отандастарына көмек көрсетсе садақасы қабыл болады. Мемлекеттік көмекке қарап отырған отбасылардың жағдайынан осыны ұғуға болатындай. Олардың біразы ауласына көмір түсірілгенде қатты қуанды. Өйткені, Оңтүстіктің қысы қысқа. Үш тонна көмірмен көктемнің жылымығына ілігуге болады. Түркістан қаласының әкімдігі мұндай көмектерді тұрақты көрсетуге бағыт ұстап отыр. Бақтияр ТАЙЖАН. Оңтүстік Қазақстан облысы, Түркістан қаласы.
