Құпиясыз отбасы, сынға түспейтін махаббат жоқ

“Хабар” телеарнасы жаңа телемаусымда “Жаным” телехикаясын көрермендерге тарту етпек Таяу күндері отандастарымыз “Хабар” телеарнасында “Жаным” атты жаңа сериалды қызықтайтын болады. Осылайша “Хабар” агенттігі” АҚ өзінің 15 жылдық мерейтойлық маусымын тосын хикаямен бастағалы отыр. Көретін көз, бара­тын адам бол­са, бүгінде қазақ ки­нематогра­фия­сында тың туын­ды­лар дүниеге ке­луде, кинотеатрлар­да жаңа фильм­дердің премье­ра­ла­ры жүріп жатыр. Ал “Хабар” телеарнасы ұсын­ғалы отырған “Жаным” көрермен күткендей дүние болар-болмасы алдағы күндердің еншісінде. Де­генмен, телесериалдың авторлары ол көрермен көңілінен сөзсіз шы­ғатынына сендіріп отыр. “Хабар” агенттігінің креа­тив­ті директоры Ержан Сүлейменов: – Бұл маусымда біз кино­көр­сетілімдерге көп көңіл бөлетін бо­ламыз. Эфирде экшн де, әлемдік классика да болады. Бірақ, жаңа телемаусымда “Жаным” телесе­риа­лынан бастауды жөн көрдік. Біз кө­рер­мендерімізге тағы да отбасылық телехикаяны ұсынамыз. Бұл жәй сәнге айналған үрдіске ілесу не­месе рейтинг қуалау емес, отба­сын­дағы татулық, ша­ңы­рақтағы жылулық, бәрімізді бірік­тіретін сыйластық пен сезім туралы хикая, – дейді. Телехикаяда танымал актер­лар­мен бірге, жас таланттар, тіпті кездейсоқ қабілетті жандарды табуға болады. Қыз Жібек атымен қазақ кинематографиясының шежіресіне есімі енген Меруерт Өтекешова басты рөлдердің бірін ойнайды. – Көңілден шығар жұмыс ті­леп жүрген кезім еді. Жұмыс бол­ғанда да, терең, ойлы, мағыналы, психоло­гиялық рөл болса деп армандап жүр­гем. Дәл осы ұсыныс менің көңі­лім­нен шықты да, “Жа­ным” жобасына қатысуға қуана келісім бердім, – дейді Өтеке­шова. Бұл жолы біз Меруерт ха­ным­ды мүлде жаңа қы­рынан кө­ретін боламыз. Басты рөл­дерді ой­найтын­дардың қатарында Оразхан Кенебаев, Ғани Құлжанов сынды танымал актерлар, Маржан Қазы­баева, Дастан Шәкіров, Яна Боб­рыка, Султанна Кәрімова се­кіл­ді дарынды жастар бар. Се­риалдың өне бойында “Жаным” әнін Медеу Арынбаев орындайды. “Жаным” телесериалының алғашқы маусымы 70 сериядан тұ­рады. Сериалды түсіру барысында жаңа технологиялық цикл қолда­нылады, яғни күніне бір сериядан түсіріліп отырады. Актерларға тү­сіру алаңында түнемесе де, тәулі­г­і­не 12 сағат жұмыс істеуге тура ке­луде. 40 адамнан құралған түсіру тобы бүкіл жаз бойы күндіз күлкі, түнде ұйқы көрмей еңбектеніп жатқанына сене беріңіз. “Мен өз­ім­нің кинематографист-әріп­тес­те­ріммен сөйлескенімде олардың еш­қайсысы әлі күнге дейін ос­ын­дай ырғақта жұмыс істеп көрмепті. Біздер сериалдың алғашқы бло­гын, 12 сериалды 12 күнде түсіріп біттік”, дейді фильмнің қоюшы-режиссері Бақтияр Сейітқазиев. Қалай десек те, “сүйегі” мық­ты сценарий туып жатса, бізде оны келістіріп бейнелейтін талант­тар табылады. Бұл сериалдың тағы бір ерекшелігі – бас аяғы бүтін, дайын әдеби шығармаға құрылған. Сценарий телесериалдың продю­се­рі Әлия Увальжанованың “Ту­ыс­қандарым менің” дейтін дайын көркем дүниесінің негізінде туған. Сонымен жаңа телесериалдың тұсаукесеріне байланысты өткен баспасөз мәслихатында “Жаным” се­риалының мақтауы мен жар­на­масынан кемшін көре қоймадық. Қай кездегідей, қазақ тілді жур­на­листердің “Сериал неге мемле­кет­тік тілде жасалынбады?” деген са­уалына, түсіру тобы төмендегідей уәж айтты. Қыс­қасы, аталмыш телехикая алдағы уа­қытта көрші елдерде, ТМД аумағында теле­про­­катта жүретін болады. Айнаш ЕСАЛИ. Алматы. ------------------------------- Суретті түсірген Юрий БЕККЕР.