Елдестіруді еңселендіре түсуге келген елшілер

Кеше Елбасы Нұрсұлтан Назарбаев Ақордада Әзірбайжан Рес­публикасы, Ирак Республикасы, Қытай Халық Республикасы, Пәкс­тан Ислам Республикасы, Түрік Республикасы және Украина елде­рі­нің Қазақстандағы Төтенше және өкілетті елшілері Закир Гашимов, Раджех Сабер Аббуд әл-Мусауи, Чжоу Ли, Мохаммед Туфаиль, Лале Үлкер және Олег Деминнен Сенім грамоталарын қабылдады. Салтанатты жағдайда Сенім грамоталарын қабылдаған соң Президент Нұрсұлтан Назарбаев олардың алдында қысқа сөз сөйледі. Елбасы алдымен дипло­мат­тарды Қазақстандағы қызмет­те­рінің басталуымен құттықтап, ол күннің күллі мұсылман қауы­мы үшін қасиетті болып санала­тын Ораза айтының күніне дөп келіп отырғанын жақсы нышанға жоритынын тілге тиек етті. Одан әрі Президент елшілердің дип­ло­матиялық жұмыстары Қазақстан­ның сыртқы саяси беделінің ар­тып, аса танымал халықаралық ұйымдарда төрағалық ету кезеңі­мен сәйкес келіп отырғанын ауыз­ға ала отырып, үстіміздегі жыл­дың 1-2 желтоқсанында Ас­танада ЕҚЫҰ саммитінің өтетінін еске салды. Бұл – Қазақстан үшін тарихи жетістік деп айтуға бола­тын оқиға, деді ол. Елбасы Н.Назарбаев бүгінгі елшілер келген мемлекеттермен Қа­зақстанның байланысына қыс­қа­ша тоқталып өтті. Соның ішінде Ирак туралы айтқанда осы ел басшылығының Астанада Төтенше және өкілетті елшісін тағайындау туралы шешімін құп­тай­тынын, Ирак елі араб әле­мін­дегі Қазақстанға барынша жақын орналасқан ел екендігін, сон­дық­тан да Қазақстанның Иракта бей­біт­шілік пен тұрақтылықтың түп­кілікті орнауына, тұрмыс ахуа­лы­ның қайтадан қалпына келтірілуі­не мүдделі екенін айта келіп, біз­дің әскерилеріміздің Ирактағы жағ­дайды қалпына келтіруге қос­қан үлестерін атап өтті. Біздің ма­ман­дар Иракта 4 млн.-нан астам жа­рылғыш заттарды залалсыз­дан­дыр­ды және мыңдаған бейбіт тұрғындарға медициналық көмек көрсетті, деді ол. Әзірбайжан Республикасы ту­ралы айтқанда оның Каспий те­ңі­зіндегі маңызды көршіміз еке­нін ауызға алды. Бізді тарихи та­мырымыздың бірлігі ғана емес, екіжақты сауда-экономикалық ын­тымақтастықтарымызды дамы­туға деген ұмтылысымыз, Каспий проблематикасы бойынша пози­ция­мыздың біртектілігі де жа­қындастырады, деді Президент. Қазақстан Оңтүстік Азия аймағы мен Ислам әлемінде ма­ңызды орны бар Пәкстан Ислам Республикасымен де жан-жақты ынтымақтастықты дамыта түсуге мүдделі. Қазірдің өзінде біздің елдеріміз көптеген аймақтық және халықаралық ұйымдар шең­берінде өзара тығыз іс-қимылдар жасауда, деді Елбасы. Ал биылғы болған су тасқынына байланысты Қазақстанның Пәкстанға қаржы­лай көмек беру туралы шешім қа­былдағанын жеткізді. – Қытай Халық Респуб­ли­ка­сымен ынтымақтастық Қазақ­стан­ның сыртқы саясатының ма­ңызды бағыты болып табылады. Ол сауда-экономикалық байла­ныс­тардың үдемелі өсуіне негіз­делген табысты әріптестіктің жар­қын үлгісі. Біз халықаралық аре­нада да белсенді бірлескен әріп­тестер болып табыламыз. Біздің әріптестігіміз саяси сенім­ді­лік­тің жоғары деңгейіне жеткен. Бү­гінгі Қазақстан-Қытай стратегия­лық әріптестігі өңірлік тұрақ­ты­лық пен қауіпсіздіктің маңызды факторы болып табылады, деді Нұрсұлтан Әбішұлы. Одан әрі Елбасы бауырлас Түрік Республикасымен арадағы байланыстарға қысқаша сипат берді. Қазақстан Түркиямен ара­дағы қөпқырлы іс-қимылдардың дами түскенін қалайды. Соның ішінде сауда-экономикалық және инвестициялық саладағы ынты­мақ­тастықтарды тереңдете түсуге “Жаңа синергия” атты бірлескен бағдарлама тың серпін берер де­ген үміттеміз. “Сондай-ақ біз жаңа жалпытүркілік құрылым­дар­ды дамыту жолында Түркиямен бірлескен күш-жігерімізді жалғас­тыра беретін боламыз”, деп жалғастырды Елбасы. Қазақстан Украинамен ынты­мақ­тастықты одан әрі нығайтуға мүдделі. Біздің елдерімізді тарихи және мәдени байланыстар бірік­тіреді. Қазақстанды мекендейтін украин халқы өкілдерінің қалың қауымдастығы біздің елдерімізді жақындастырудың маңызды факторы. Украина Президенті В.Яну­ковичтің осы жылдың сәуір айында Қазақстанға жасаған рес­ми сапары мен менің жақын күн­дерде Украинада болатын ресми сапарым екі елдің арасындағы қарым-қатынастық аясын кеңей­ту­ге жаңа серпін берері сөз­сіз, деді Елбасы Украинаға қатыс­ты сөзінде. Сөзінің соңында Президент елшілерге Астана Қазақстандағы оң өзгерістер мен жаңарулардың айнасы екендігін айта келіп, онда жұ­мыс істеуге және демалуға барлық жағдай жасалған деп сөзін аяқтады. Жақсыбай САМРАТ.