Бюджет заңнамалары айналымға алынды

Мәжіліс Төрағасы Орал Мұхамеджановтың жетекшілігімен өткен палатаның сәрсенбі күнгі пленарлық отырысының күн тәртібінде 2011-2013 жылдарға арналған республикалық бюджетке қатысты заңдық құжаттар қаралып, қорытынды әзірлеу уақыты белгіленді. “2011-2013 жылдарға арналған республикалық бюджет туралы” заң жобасы, Ұлттық қордан 2011-2013 жылдарға арналған кепілдендіріл­ген трансферт және республи­ка­лық, облыстық бюджеттер, рес­пуб­ликалық маңызы бар қала, астана бюджеттері арасындағы 2011-2013 жылдарға арналған жалпы сипат­та­ғы трансферттердің көлемі туралы заңдық құжаттар айналымға алын­ды. Сол сияқты “Қазақстан Рес­пуб­ликасы мен Корея Респуб­ли­ка­сы арасындағы Ұстап беру туралы шартты ратификациялау туралы” және соған жапсарлас Қылмыстық істер бойынша өзара құқықтық кө­мек туралы шартты бекіту заң жо­ба­лары қолдау тауып, қорытынды әзірленетін болып шешілді. Сон­дай-ақ отырыс барысында кезінде Мәжіліс депутаты болған, белгілі қо­ғам қайраткері Қаратай Тұры­сов­қа Астанадағы бір көшенің аты бе­рілуіне орай осындай шешім шы­ғарған мәслихат депутаттарына ри­зашылық хатын жолдау туралы шешім қабылданды. Депутаттық сауалдар әдеттегіше бір сағатқа созылды. Зағипа Ба­лиева мемлекеттік қызмет көрсету саласында, әсіресе, жеке куәліктер мен паспорт беру орындарының жұ­мысын тексеру мақсатында пар­тиялық комиссия құру қажеттігіне назар аудартты. Егер ондай комис­сия құрылғандай болса, онда оның құрамына Парламент депутаттарын да енгізу керек, деп санайды З.Балиева. Қожа Ахмет Ясауи кесенесінің қа­зіргі мүшкіл жағдайы Розақұл Хал­мұрадов сауалында өткір қойылды. Депутат кесенеге 1993-2002 жылдар аралығында түркия­лық бір фирманың күрделі жөндеу жүргізгендігін тілге тиек ете келіп, тиісті құзіретті мекемелер тара­пы­нан қабылданып алған нысанда гидроизоляция және бөлмелерінің вентиляция жүйелері бұзылған­дығы анықталғандығын алға тартты. Соның салдарынан кесене қабыр­ға­лары сызданып, кірпіштері мүжі­ле бастаған. Егер жағдай осылайша қала берсе, онда кесененің үстіндегі үлкен күмбез бір күні құлауы да мүмкін екен. Қазіргі таңда “Қ.Ясауи кесенесін қорғау” қо­ғамдық бірлестігі және облыстық әкімшілік тарапынан құрылған ко­миссия сәулет өнерінің жауһарын сақтап қалуға кірісіп те кетіпті. Алайда депутат Үкімет тарапынан нен­дей іс-шаралар қолға алынарын білгісі келерін айтып, Премьердің атына сауал жолдады. Асқар ТҰРАПБАЙҰЛЫ.