Жаңа жобаларға жол ашық

“Нұр Отан” ХДП облыстық филиалының мәжіліс залында “Береке-Бірлік” пікірталас клубының ұйымдастыруымен “Астана қаласының аймақтық технопаркі” жауапкершілігі шектеулі серіктестігі үлгісіндегі инновациялық индустрияландыру Ақмола облысының ойдағыдай дамуының тиімді жолы” атты кеңес болып өтті. Мәжіліске мемлекеттік орган­дар­дың басшылары, кәсіпкерлер, саяси партиялар мен қоғамдық бір­лестіктердің өкілдері, жоғары оқу орындарының оқытушылары мен студенттері қатысты. Оның жұмы­сын жүргізіп отырған партияның облыстық филиалы төрағасының бірінші орынбасары Ғалым Шой­кин экономиканы дамытудың өңір­лік басым бағыттарының мақсат­тарына тоқталды. – Жеке кәсіпкерлік мемлекет­тік саясаттың қозғаушы күшіне ай­налды, – деді ол. – Оны дамыту­дың тірек заңнамалары қалып­та­сып, Үкімет тарапынан қолдау ша­ра­ларының өрісі кеңейді. “Астана технопаркінің” облысымызға келуі өңірлік тартымдылықтың өскен­ді­гін айқындайды. Қазіргі талап – өндірісті әртараптандырып, шикі­зат­тық емес саланы өркендету. Мұнда озық үлгідегі инновациялық жобалар ғана табысқа бастайды. Жергілікті кәсіпкерлер қонақтары­мыз­дың ұсыныстарын саралап, әріптестік байланыстың жемісін көретініне сенімдімін. “Астана қаласының аймақтық технопаркі” ЖШС директоры Мұрат Ақшалов уақыт талабындағы кәсіпорынның жұмыс жоспарлары мен атқарылған істер жайында егжей-тегжейлі әңгімеледі. Қазақ­станда қазір осындай 8 технопарк жұмыс істейді. Олар үдемелі ин­дустриялық-инновациялық дамуды көздейтін мемлекеттік бағдарлама шеңберінде құрылған. Технопарк­тер бизнес құрылымдары мен жас кәсіпкерлерге интернеттік мәлімет, бухгалтерлік және заңгерлік кеңес беріп, болашағы мол ғылыми тех­но­логияны, ішкі рынокта сұраныс­қа ие және экспорттық әлеуеті жо­ғары тауар өндіру мен қызметтерді құруға септеседі. Жаңа әрі тиімді жобаларға инвестиция тарту, озық технологияларды кәсіби сарапта­мадан өткізіп, өндіріске енгізу жұмыстың негізгі бағыты саналады. Директордың айтуынша, үстіміздегі жылы технологиялық бизнесті дамыту қызметіне бюджеттен 245 миллион теңге қаржы бөлінген. Кеңеске қатысушылар техно­парк ұйымдастырған көрмені тама­шалап, іскерлік кеңестер алды. “Нұр Отан” партиясының облыс­тық филиалында “Бизнестің жол картасы–2020” арнайы бөлме жаб­дықталатын болды. Бақберген АМАЛБЕК. Ақмола облысы.