17 Қыркүйек, 2010

Жарайсың, Алмат!

361 рет көрсетілді
Шығыс Қазақстан облысының Үржар ауданындағы Олимпиялық резервке мамандан­дырылған балалар мен жасөспірімдерге арналған спорт мектебінің тәрбиеленушісі Алмат Кебісбаев Мәскеу қаласында өткен әлем чемпионатынан қола медальмен оралды. Әлем біріншілігі үшін күрес қыркүйек айы­ның 6-сы мен 8-і күндері Мәскеу қала­сында өтті. Оған елімізден 7 балуан, ауданы­мыздан 3 балуан қа­тысты. Мәртебелі әлемдік жарыста Алмат қанжы­ғасына медаль байлап, Ресейден еліміздің көк байрағын желбіретіп қайтты. Ол өзінің жетіс­тігіне дән риза. Осыған дейін Алмат басқа да жарыс­тар­да жүлделі оралып, жақсы нәтижелер көрсеткен еді. – Әлем чемпионаты өте жоғары дәре­жеде өтті, қарсыластарым да мықты болды, бірақ ештеңеге қарамастан жүлдемен орал­дым. Жат­тық­тырушымыздың еңбегі зая кет­кен жоқ деп ойлаймын, – дейді Алмат Кебісбаев. Алматтың айтулы жетістіктерінде оның бап­кері, Қазақстанның еңбек сіңірген жаттық­­тыру­шысы Бо­ранбек Қоңыратовтың еңбегі бір төбе екені сөзсіз. Ал біз, үржарлықтар Алматтың жеңісіне шы­найы қуаныштымыз. Спорттың қай саласы бол­са да Олимпиадада бағы жанып, ел мерейін асыр­са, бізге одан артық қуаныш жоқ. Балуан­дарымыздың топ жарып, медаль еншілеуінің орны бір бөлек. Аудан әкімі Бауыржан Жанақов кілем жабыл­ған үш сәйгүлікті Алмат Кебісбаев пен Дархан Баяхметовқа және осы екі балуанның жаттық­тырушысы Боранбек Қоңыратовқа табыс етті. Бұл қуаныш, бұл жеңіс ауданымыз үшін үлкен абырой. Жас балуандарға алдағы уақытта жарыстарда үлкен жетіс­тіктерге жетіп, еліміздің абыройын, даңқын асқақтата беріңдер демекпіз. Зухра ТҰРАПОВА.
Соңғы жаңалықтар

Қазақстанда қанша адам вакцина алды

Коронавирус • Бүгін, 10:42

Ұқсас жаңалықтар