17 Қыркүйек, 2010

Алыптар ауылдан шығады

782 рет
көрсетілді
3 мин
оқу үшін
Кеше Туризм және спорт министрлігінің ұйымдастыруымен Президент Н. Назарбаевтың биылғы Қазақстан халқына Жолдауының негізгі бағыттарының бірі болып белгіленген бұқаралық спортты дамытуды іске асыру мақсатында екі күнге созылған ауыл спорты мен ведомстволық статистикалық есепті жетілдіру жөнінде өткен республикалық семинар-кеңес жұмысын аяқтады. Оған барлық облыстық туризм, дене тәр­биесі және спорт басқармалары бастығының орын­басарлары, аудандық туризм, дене тәр­биесі және спорт басқармаларының басшы­лары Ауыл шаруашылығы, Білім және ғылым ми­нистр­ліктері, Статистика агенттігі мамандары мен спорттық клубтар, қоғамдық бірлестіктер мен бұқаралық ақпарат құралдары өкілдері қатысты. Семинар-кеңесте “Ауылда бұқаралық спорт­ты дамыту”, “Нұсқаушы-әдіскерлер ауыл спорты­ның негізгі ұйытқысы”, “Ауыл спорты­ның инфрақұрылымы. Жетістіктері, проблема­лары және болашағы”, “Ведомстволық ста­тис­тикалық есепті жетілдірудің негізгі бағыттары” “Ауыл спортының кешегісі мен бүгіні”, “Ауыл­да бос уақытты өткізуді ұйымдастыру ретінде бұқ­ара­лық спортты дамыту”, “Ауыл спорты және бұ­қ­аралық ақпарат құралдары”, “Ауыл мүгедек­терінің арасында спортты дамы­ту” атты тақы­рып­­тарда мәселелер қаралып, баяндамалар жасалды. Қазіргі кезде еліміздің спорттық жетістіктері көбіне-көп ауылды мекенде қаланатынын спорт­шыларымыздың байрақты бәсекелердегі нәтижелері көрсетіп отыр. Оған мысал ретінде Олимпия ойындарының, Азия чемпионат­тары­ның, әлем кубоктары мен басқа да көптеген халықаралық жарыстарда жеңімпаз атанған отандастарымыздың басым көпшілігі ауылды жерден шыққанын айтуға болады. Мәселен, тұңғыш Олимпиада чемпионы атанған қазақ Әлжан Жармұхамедов, Жақсылық Үшкемпіров, халық­аралық жарыстардың жеңімпазы Әбіл­сейіт Айханов, Қабден Байдосов, Аманжол Бұ­ғы­­баев, Амангелді Ғабсатаров, Қанат Бай­шолақов пен басқалары бала кезінен ауылдың шаңын қағып өскен спортшылар. Осыған байланысты кеңес­те министрліктің Спорт істері жөніндегі коми­теті ауыл спортын дамыту, елді мекендерде спортқа деген ынтасы бар жастарды қолдау үшін атақты спортшыларды, демеуші­лерді мүмкіндік­теріне қарай туған ауылдарында, спорттық және жалпы білім беру мектептерінде спортты дамыту­ды тұрақты негізде қамқорлық­қа алуға шақырды. Осы жерде ауылдық спортты дамыту жұмысын ұйымдастыру үшін Ауыл шаруашы­лығы ми­нистрлігінің төңірегінде “Қайрат” ауылдық дене тәрбиесі және спорт­тық бірлестікті құру жөнінде мәселе көтерілді. Бұл істің маңыздылығы ескері­ле отырып, Ауыл шаруашылығы министрлігі мен Туризм және спорт министр­лігінің арасында дене тәрбиесі және спорт саласында бірлескен меморандум әзір­леу керектігі айтылды. Сөйтіп, меморан­дум­ның нұсқасы Ауыл шаруашылығы министр­лігіне таныстыруға жіберілді. Семинардың соңында “Бұқаралық спортты дамыту”, “Гимнастика бәріміз үшін” жоба­лары мен “Алдаспан” атты сауықтыру әдісте­менің тұсаукесері, “Қазақстан спортының та­ри­хы мен бүгіні” атты жылжымалы фото­көрме өткізілді. Дастан КЕНЖАЛИН.