Арсенал сенімді қолда

Тарихы 1930 жылдан бастау алатын 44859-әскери бөлімі алғаш рет №42 қойма ретінде құрылды. 1947 жылы әскери қойма 175-ші округтік артиллериялық оқ-дәрі базасы болды. 1969 жылдан бастап оның мәртебесі өсіп, оған жаңа штат, жаңа міндет және жаңа атау берілді. Бөлім әскерлерді зениттік, жедел-тактикалық ракеталармен және алуан түрлі оқ-дәрілермен қамтамасыз етуге, өнімді зауыт­тардан қабылдап алып, әскери қоймаларда сақтауға, оны жөндеп, жинастырып, техникалық қызмет көрсетуге арналған. Ұлы Отан соғысы жылдарында және Ауғанстан Демократиялық Республикасына интернационал­дық көмек көрсету кезеңдерінде әскери бөлімнің атқарған рөлі зор. Тоқсаныншы жылдардың ба­сынд­а кеңестік держава ыдыра­ды, оның салдары қорғаныс өнер­кәсібіне де тимей қалмады. Осы­ған қарамастан арсеналдағы жұ­мыс тоқтаған жоқ. Сол ауыр жыл­дары ар­сеналдың командирі болып пол­ковник Сергей Анпилогов та­ғайын­далды. Ол ұжымдағы жұ­мыс­тың оңға басуына өзіндік үле­сін қосты. Оған адамдар сенді, кадр мәселесі­нің тапшылығына қарамастан алға қойылған тапсыр­малар орындалды. Оның жеке басшылығымен әскери қала­шықты абаттандыру, казарма­лар­ды жөндеу, асхананы жабдық­тау жұмыстары жүргізілді. Бүгінде әскери бөлім орналас­қан қалашық Қарулы Күштерде үлгі тұтарлық нысанның біріне ай­налды. Мұнда 500 орындық клуб, заманауи ашық спорт кеше­ні, ба­ла­ларға арналған ойын алаң­дары, жаңа өрт сөндіру депосы бар. Биыл әскери қызметкерлерге арналған жаңа тұрғын үй пайда­лануға бері­леді деп жоспарланған. Қорғаныс министрі­нің орынба­сары генерал-майор Н.А.Жолама­нов­тың үздіксіз бақы­лауының нәтижесінде бұл тұр­ғын үйлер сапалы салынып, уақ­ты­лы беріл­гелі тұр. Сондай-ақ бө­лім­ді сумен тұрақты қамтамасыз ету мақ­са­тында жаңа су сорғы стан­сасы іс­ке қосылды. Бұдан бас­қа да әлеу­меттік тұрғыдағы өзек­ті мәсе­лелер шешімдерін тауып келе­ді. Жер­гілікті билік органдарымен қарым-қатынас та дұрыс жолға қойылған. Арсенал басшылығын 2005 жы­лы қолына алған полковник К.Нұрмаханбетов өзінің әділ әрі талап қоя білетін командир екен­дігін таныта білді. Бөлімнің бүгінгі тыныс-тірлігіндегі табыс­тары мен жағымды келбетінде командир қолтаңбасы да бар. Қорғаныс министрі мен Штаб­тар бастықтары комитеті төрағасы­ның бұйрықтары мен дирек­тива­ларында көрсетілген талаптарға сәй­кес бөлім жеке құрамының күші­мен оқ-дәрілердің қауіпсіз­дігін сақтауда айтарлықтай жұмыстар атқарылды. Күзеттің сенімді әрі қауіпсіз болуы үшін 2003 жылы “Қуат” ғылыми-өндірістік бірлестігі күзет пен өрт қатері кезінде дабыл беретін кешенді жабдық орнатты. Жабдықты техникалық құралдар­дың жұмысын бақылайтын кезек­ші оператор іске қосып, үнемі назарда ұстайды. Штабтар бастықтары төрағасы­ның бұйрығына сәйкес 2005 жыл­дың мамыр айынан бастап әскери бөлімнің базасында қару-жарақ пен оқ-дәрілер қоймасы бастық­тарының курстық әзірліктері өт­кізіліп келеді. Курстық әзір­ліктің негізгі мақсаты әскерлердегі қару-жарақ пен оқ-дәрілер сақтау қой­малары бастық­тарының міндетін уақытша атқару­шылардың білімін жетілдіру болып табылады. Мұнда тактика, техника, атыс, ин­женер­лік өнер, өртке қарсы күрес, сапта жүру, әскери меди­ци­на, мемле­кеттік-құқықтық дайын­дықтары­нан дәріс беріледі. Курстық әзір­лікті сәтті аяқтаған тыңдаушы­ларға бітіргендігі туралы арнайы куәлік табыс етіледі. Тыңдаушыларды оқытуда бөлім офицерлері өздерінің жи­нақ­таған мол тәжірибелері мен кәсіби білім­дерін сарбаздар санасына сіңіре білуде. Қазіргі уақытта әскери бөлім өзінің мерейтойына қызу дайын­дық үстінде. Ұжым еліміздің қор­ғаныс қабілетінің нығая түсуіне өздерінің елеулі үлес қосып жүр­гендіктерін мақтан тұтады. Н.ШЫРЫНБЕК, майор, 44859-әскери бөлім командирінің тәрбие және әлеуметтік-құқықтық жұмыстар жөніндегі орынбасары.