Ата Заңға арналған ғылыми конференция

С.Аманжолов атындағы Шығыс Қазақстан мемлекеттік университетінде “Конституция – тәуелсіз Қазақстан­ның тұрақ­ты және қауіпсіз дамуының негізі” атты республикалық ғы­лыми-тәжірибелік конфе­рен­циясы болып өтті. Оның жұ­мысына облыс әкімі Б.Сапар­баев, Конституциялық Кеңес Төрағасы Игорь Рогов, Пре­зидент жанындағы Заң шығару институтының директоры Ж.Бұ­сыр­манов, Тұңғыш Президент жанындағы Әлемдік эко­номика және саясат институтының ди­ректоры Ә.Темірбеков, Қазақ­стан халқы Ассамблеясы Төраға­сының орын­басары Ералы Тоғ­жанов, тағы басқалар қатысты. – Әр мемлекеттің құқықтық не­гі­зін, оның өсіп-дамуын сол елдің ата заңы белгілейтіні бел­гілі, – деді кон­ференция жұ­мысын ашқан өңір ба­с­шысы Бердібек Мәшбекұлы. – Осыдан 15 жыл бұрын Ата Заңды қабылдадық. Саяси мәні жоғары Ата Заңымыздың арқасында талай биік асуларға көте­ріл­дік, көптеген халықаралық ұйым­дарға мүше болдық. Қазір біздер ЕҚЫҰ-ға жетекшілік етудеміз. 11 жыл бойы тоқ­тап қалған ЕҚЫҰ-ға мүше мемлекеттер бас­шыларының Саммитін өткізетін болып жатырмыз. Бұл күндері Кенді Алтайда 75 этномәдени бірлестік жұ­мыс істейді. Бес “Достық” үйі бар. Аймақтағы үкіметтік емес ұйымдар санының өзі 650-ден асты. Халықтың әл-ауқаты жақсара түсті. Соңғы 15 жылда ғана бізде орташа еңбек­ақы 11 есе өскен. 15 жылда 42 мектеп, 52 балабақша пайда­ла­ну­ға берілді. Міне, мұның бар­лығы Ата Заңымыздың жарқын болашағын көрсетсе керек. Бұдан кейін өңір басшысы сөз кезегін бұдан 15 жыл бұрын қабылдан­ған Консти­туция ав­тор­ларының бірі, мемлекет қай­раткері, ғалым Игорь Ро­говқа берді. Бұдан 15 жыл бұрын бү­кілхалықтық ре­ферендумға 7 миллион­нан астам қазақ­стан­­дықтың Консти­туцияны жақтап, дауыс бергенін, өз таң­дауын жасағанын білесіздер. Қазақ­стан президенттік рес­публика болып, тәуел­сіз елдің жаңа тарихының жарқын па­рағы ашылды. Конс­титуция бойынша өмір сүруге үйрену керек, оны дағдыға айналдырған жөн. Демек, Ата Заңды біліп, соған сәйкес өмір сүру қажет, деді И.Рогов. Сол күні ғылыми-тәжірибелік кон­ференцияға қатысушылар Ата Заңның 15 жылдығына арналған арнайы көрме мен бейнефильмді тамашалады. И. Рогов ШҚМУ-дағы Конституция каби­нетінің ашылуына қатысып, естелікке кітап тарту етті. Оңдасын ЕЛУБАЙ. Өскемен.