Бокс

Қоржын жүлдеге толық АҚШ-тың Камп-Лэйн қаласында бокстан әскерилер арасындағы әлем чемпионаты өз мәресіне жетті. Осы жарыста бақ сынаған еліміздің былғары қолғап шеберлері екі алтын, үш күміс, төрт қола медальмен жалпыкомандалық есепте жеңіс сатысының ең биік тұғырына көтерілді. Осымен 53-ші рет жалауын көтеріп отырған бокс бәсекесінде сайыпқырандарымыз жан­күйерлерге зор қуаныш сыйлады. Чемпионат барысында финалға дейін алқынбай жеткен бес боксшымыздың екеуі чемпионаттың жеңімпазы атанды. Атап айтқанда, 60 килода биылғы ел біріншілігінің қола жүлдегері Берік Әбдірах­манов финалда Италия үміті Лессио Сави­ноны тізе бүктіріп, алтыннан алқа тақты. Ал 64 кило­да өнер көрсеткен Бейжің Олимпиадасына қатысу­шы Мерей Ақшалов америкалық Джэймел Херрингке басымдық танытып, әлем чемпионы атанды. Шаршы алаң иесі өз елінің жанкүйер­лері алдында намысқа тырысқаны­мен, жеңісті өз пайдасына шеше алмады. Өкінішке қарай, 49 килода шаршы алаңға шыққан астаналық Ілияс Сүлейменов америка­лық бақталасы Майкл Бенедоссоға есе жіберіп қой­ды. Әйтсе де Ілияс­тың ересектер дуына енді қо­сыл­ғанын ескерсек, бұл табысына қуана қол соғуға болады. 56 килода ел на­мы­сын қорғаған Ас­лан Мұқанов үнді боксшысы Сантос Сингхке шамасы жетпеді. 81 килода күміс жүл­деге ие бол­ған мақтаулы боксшымыз, 2005 жылғы әлем чем­пионы Ердос Жаңа­бергенов америкалық қар­сыласы Джеффри Спэнсерден айласын асыра алма­ды. Дегенмен, Ердос өзінің даңқын асырған үй­рен­шікті салмағы 81 килоға жуықта ғана қайта ауыс­қанын айта кетейік. Спорт жанкүйерлерінің есінде болса керек, 2005 жылы Ердос Жаңа­бергенов осы 81 кило салмақ дәрежесінде әлем чемпионы атанған еді. Бұдан бөлек төрт шойын жұдырықты жігі­тіміз 69 ки­лода Шыңғыс Бердібеков, 75 кг-де Нұрбота Сейіт­бек, 91 кг-де Қамшыбек Құңқа­баев және 91 килодан жоғары салмақта Руслан Мырсатаев әскерилер ара­сын­дағы әлем чем­пио­натының қола жүлдегері атанды. Қазақ боксшылары жалпыкомандалық есеп­те өз тарихында тұңғыш рет Әскерилер арасын­дағы әлем чемпионатында бірінші орынды жеңіп алды. Екінші орынға Бразилия боксшылары, үшінші сатыға ринг иелері АҚШ құрамасы жайғасты. Сәбит ТАСТАНБЕКҰЛЫ. Азия ойындарына бір ай бар Бір айдан кейін Қытайдың Гуанчжоу қаласында жазғы Азия ойындары басталады. Қазір бәсірелі бәсекеге қатысатын елдердің қатарында Қазақстан құрамасы да оған  жан-жақты дайындалуда. Азиадада спорттың бірнеше түрінен жарыс­тың өтетіні белгілі. Соның ішінде бокс бәсекесі­нің қызық­ты да тартысты болатыны сөзсіз. Осыған байланысты ұлттық құраманың бас бапкері Мыр­зағали Айтжанов Қытайға баратын спорт­шы­лардың тізімін жария етті. Сөйтіп, Гуанч­жоуға баратын 10 боксшы мыналар: Біржан Жақып (49 кг), Мирас Жақыпов (52 кг), Да­нияр Төле­генов (56 кг), Самат Бәшенов (60 кг), Да­нияр Елеусінов (64 кг), Серік Сәпиев (69 кг), Данабек Сужанов (75 кг), Алмат Селімов (81 кг), Василий Левит (91 кг) және 91 кг-ден жоғары салмақтағы Иван Дычко. Жартылай финалда – оңтүстік құрамасы Таразда Қазақстан Бокс федерация­сының кубогы жолындағы ширек- финалдық кездесулердің соңғысы өтті. “Оңтүстік” дивизионына кіретін Оңтүстік Қазақстан мен Жамбыл облысының арасында өткен жекпе-жекте алғашқылары жеңіске жетті. Бұл бәсеке 5:5 есебімен аяқталғанымен, ел кубо­гының ережесіне сәйкес ауыр салмақтағы шымкенттік Досжан Оспанов қарсыласын жеңгеннен кейін жар­тылай финалға жолдама ОҚО командасына берілді. Кездесуде оңтүстік командасының қа­тарында Рүстем Сыбаев, Нұрдәулет Жарманов, Ерке­бұлан Шыналиев, Досжан Оспанов сияқты елі­мізге танымал боксшылар күш сынасса, Жамбыл облысының аты­нан Олжас Сәттібаев, Ғани Жайлауов пен Украи­надан келген Вячеслав Шабранский қолғап түйістірді. Енді жартылай финалда ОҚО командасы Маңғыстау облысының өрендерімен бақ сынасады.